Tirumala Temple: లైకుల కోసం ఇంత దిగజారాలా? శ్రీవారి సన్నిధిని ప్రమోషన్ల వేదికగా మార్చిన జంట! |

తాజాగా ఒక జంట తిరుమల ఆలయ పరిసరాల్లో రీల్స్ చిత్రీకరించి, వాటిని సోషల్ మీడియాలో ప్రమోషన్ల కోసం ఉపయోగించడం భక్తుల ఆగ్రహానికి కారణమైంది. భక్తిభావంతో స్వామివారిని దర్శించుకోవడానికి వచ్చే సామాన్య భక్తులు గంటల తరబడి క్యూ లైన్లలో వేచి ఉంటే, కొందరు మాత్రం తమ పబ్లిసిటీ కోసం నిబంధనలను అతిక్రమించడం పట్ల నెటిజన్లు మండిపడుతున్నారు. ఇది కేవలం ఒక వీడియో చిత్రీకరణ మాత్రమే కాదు, కోట్లాది మంది భక్తుల మనోభావాలను దెబ్బతీయడమేనని ఆధ్యాత్మిక వేత్తలు అభిప్రాయపడుతున్నారు.

గతంలో దివ్వెల మాధురి, గీతూ రాయల్ వంటి వారు తిరుమల పరిసరాల్లో చేసిన వీడియోలు, ఫోటో షూట్లు పెద్ద ఎత్తున చర్చకు దారితీశాయి. ఆ సమయంలో టీటీడీ యంత్రాంగం కఠిన చర్యలు తీసుకుంటామని హెచ్చరించినప్పటికీ, మళ్లీ ఇలాంటి ఘటనలు వెలుగుచూడటం భద్రతా వైఫల్యాలను ఎత్తిచూపుతోంది. వేల సంఖ్యలో విజిలెన్స్ సిబ్బంది, సిసి కెమెరాల నిఘా ఉన్నప్పటికీ, ప్రమోషన్ల కోసం వీడియోలు ఎలా చిత్రీకరిస్తున్నారనేది ఇప్పుడు మిలియన్ డాలర్ల ప్రశ్నగా మారింది.

లైకులు, షేర్ల కోసం పవిత్రమైన పుణ్యక్షేత్రాలను షూటింగ్ స్పాట్లుగా మార్చుకోవడం అనైతికమని భక్తులు వాపోతున్నారు. తిరుమల వంటి ప్రదేశాల్లో భగవంతుని నామస్మరణ మినహా, వ్యక్తిగత ప్రదర్శనలకు తావుండకూడదని వారు కోరుతున్నారు. ఇలాంటి వారిపై కేవలం జరిమానాలతో సరిపెట్టకుండా, క్రిమినల్ కేసులు నమోదు చేయాలని, భవిష్యత్తులో కొండపైకి రాకుండా నిషేధం విధించాలని డిమాండ్లు వినిపిస్తున్నాయి.

తిరుమల పవిత్రతను కాపాడటం కేవలం టీటీడీ బాధ్యత మాత్రమే కాదు, ప్రతి భక్తుని కనీస ధర్మం. అధికారులు నిఘాను మరింత కట్టుదిట్టం చేయడంతో పాటు, సోషల్ మీడియా ఇన్‌ఫ్లుయెన్సర్లు పవిత్ర స్థలాల పట్ల గౌరవంతో మెలగాల్సిన అవసరం ఉంది. ఈ తాజా ఘటనపై టీటీడీ అధికారులు ఎలాంటి చర్యలు తీసుకుంటారో వేచి చూడాలి.