Kanipakam Temple: భక్తులతో పోటెత్తిన కాణిపాకం.. దర్శనానికి ఎంత సమయం పడుతుందో తెలుసా.. |

ప్రస్తుతం నాలుగు రోజుల పాటు వరుసగా సెలవులు రావడంతో, సాధారణ భక్తులతో పాటు పర్యాటకుల సంఖ్య భారీగా పెరిగింది. ఆంధ్రప్రదేశ్, తెలంగాణ రాష్ట్రాల నుంచే కాకుండా సరిహద్దు రాష్ట్రాలైన తమిళనాడు, కర్ణాటక నుంచి భక్తులు భారీ వాహనాల్లో తరలివచ్చారు.

శనివారం తెల్లవారుజాము నుంచే భక్తులు స్వామివారి దర్శనం కోసం క్యూ లైన్లలో వేచి ఉన్నారు. ఆలయ వెలుపల ఉన్న కంపార్ట్‌మెంట్లు అన్నీ భక్తులతో నిండిపోయాయి. ప్రస్తుత రద్దీ దృష్ట్యా, సర్వదర్శనం కోసం వేచి ఉన్న భక్తులకు కనీసం 3 నుంచి 4 గంటల సమయం పడుతోంది. ఇక ప్రత్యేక ప్రవేశ దర్శనం టికెట్లు తీసుకున్న భక్తులకు గంటన్నర పైగా సమయం పడుతున్నట్లు సమాచారం.

దర్శనానికి సమయం పడుతున్నప్పటికీ, భక్తులు ఏమాత్రం అసహనం చెందకుండా ‘ఓం గం గణపతయే నమః’ అంటూ వినాయకుని నామస్మరణ చేస్తూ క్రమశిక్షణతో క్యూ లైన్లలో ముందుకు సాగుతున్నారు.

కాణిపాకం అంటేనే సత్యప్రమాణాలకు పెట్టింది పేరు. ఇక్కడ స్వామివారి ఎదుట చేసే ప్రమాణాలకు ఎంతో విలువ ఉంటుంది. అందుకే చాలా మంది భక్తులు తమ మొక్కులు తీర్చుకోవడానికి, సత్యప్రమాణాలు చేయడానికి ఈ క్షేత్రాన్ని సందర్శిస్తుంటారు.

భక్తుల రద్దీకి అనుగుణంగా ఆలయ అధికారులు లడ్డూ ప్రసాదం, ఇతర ప్రసాదాలను తగినంతగా అందుబాటులో ఉంచారు. అన్నదాన సత్రం వద్ద కూడా భక్తుల తాకిడి ఎక్కువగా ఉంది. భక్తులకు ఎటువంటి అసౌకర్యం కలగకుండా ఆలయ ఈవో మరియు పాలకమండలి ప్రత్యేక ఏర్పాట్లు చేసింది.