CM Chandrababu Naidu: దేవాన్ష్ పుట్టినరోజున తిరుమలకు ఏపీ సీఎం భారీ విరాళం.. ఎంత ఇచ్చారో తెలుసా.. | ఆంధ్రప్రదేశ్ వార్తలు

ముఖ్యమంత్రి చంద్రబాబు నాయుడు, తన మనవడు దేవాన్ష్ పుట్టినరోజు వేడుకలను అత్యంత వైభవంగా, భక్తిశ్రద్ధలతో జరుపుకోవాలని కుటుంబంతో కలిసి తిరుమలకు చేరుకున్నారు. సామాన్య భక్తులకు ఇబ్బంది కలగకుండా, నిబంధనల ప్రకారం వైకుంఠం క్యూ కాంప్లెక్స్ ద్వారా ఆయన స్వామివారిని దర్శించుకున్నారు. ఆలయ అధికారులు అర్చకులు ఆయనకు పూర్ణకుంభంతో స్వాగతం పలికారు. చంద్రబాబు వెంట ఆయన సతీమణి నారా భువనేశ్వరి, కుమారుడు రాష్ట్ర మంత్రి నారా లోకేష్, కోడలు నారా బ్రాహ్మణి, పుట్టినరోజు జరుపుకుంటున్న మనవడు దేవాన్ష్ ఉన్నారు.

స్వామివారి గర్భాలయంలో ప్రత్యేక పూజలు నిర్వహించిన అనంతరం, వేద పండితులు ముఖ్యమంత్రి కుటుంబానికి ఆశీర్వచనాలు అందజేశారు. శేష వస్త్రంతో వారిని సత్కరించి, శ్రీవారి తీర్థప్రసాదాలను అందజేశారు. నారా కుటుంబానికి తిరుమల అన్నదాన ట్రస్ట్‌తో విడదీయలేని అనుబంధం ఉంది. దేవాన్ష్ పుట్టిన ప్రతి ఏడాది, ఆ రోజున తిరుమలలో అన్నదానం చేయడం వీరికి ఒక ఆనవాయితీగా మారింది.

ఈ ఏడాది దేవాన్ష్ జన్మదినం సందర్భంగా ఒక్క రోజు అన్నదానానికి అయ్యే పూర్తి ఖర్చును ముఖ్యమంత్రి కుటుంబం భరించింది. ఇందుకోసం రూ. 44 లక్షల రూపాయల విరాళాన్ని ఎస్వీ అన్నదాన ట్రస్ట్‌కు ఇప్పటికే అందజేశారు. కేవలం విరాళం ఇవ్వడమే కాకుండా, మాతృశ్రీ తరిగొండ వెంగమాంబ అన్నదాన సత్రంలో ముఖ్యమంత్రి కుటుంబం స్వయంగా భక్తులకు అన్న ప్రసాదాన్ని వడ్డించనున్నారు. ఇది వారి సేవా దృక్పథానికి నిదర్శనంగా నిలుస్తోంది.

నారా చంద్రబాబు నాయుడు కుటుంబం ఇప్పటివరకు సుమారు 12 సార్లు అన్నదాన ట్రస్ట్‌కు భారీ విరాళాలు అందించడం విశేషం. ప్రతి శుభకార్యం వేళ శ్రీవారికి మొక్కులు చెల్లించుకోవడం, పేద భక్తులకు అన్నదానం చేయడం ద్వారా వారు తమ భక్తిని చాటుకుంటున్నారు. రాష్ట్ర ముఖ్యమంత్రి హోదాలో ఉండి కూడా, సామాన్య భక్తుల క్యూ మార్గంలో రావడం మరియు తన సొంత ఖర్చులతో అన్నదానం చేయడం వంటి చర్యలు ప్రజల్లో సానుకూల సంకేతాలను పంపుతున్నాయి. తిరుమల పర్యటన ముగించుకున్న అనంతరం, చంద్రబాబు నాయుడు రాష్ట్ర ప్రజలందరూ సుఖసంతోషాలతో ఉండాలని, రాష్ట్రం అభివృద్ధి పథంలో పయనించాలని స్వామివారిని ప్రార్థించినట్లు తెలిపారు.