తెలుగు వారి కొత్త సంవత్సరానికి నాంది పలికే ఉగాది పండుగ ఆధ్యాత్మికత, సంస్కృతి, సంప్రదాయాల సమ్మేళనంగా నిలుస్తుంది. “యుగ” మరియు “ఆది” అనే పదాల కలయికతో ఏర్పడిన ఈ పండుగ పేరు ‘సృష్టి ఆరంభం’ అనే అర్థాన్ని కలిగి ఉంది. తెలుగు పంచాంగం ప్రకారం చైత్ర మాసపు పాడ్యమి రోజున జరుపుకునే ఈ పండుగను బ్రహ్మదేవుడు సృష్టిని ప్రారంభించిన రోజుగా పురాణాలు విశదీకరిస్తాయి. ఈ నేపథ్యంలో దేవాలయాలు, గ్రామాలు, పట్టణాలు అన్నీ ఆధ్యాత్మిక ఉత్సాహంతో కళకళలాడుతుంటాయి. ముఖ్యంగా పండితులు నిర్వహించే పంచాంగ శ్రవణం ద్వారా ఆ సంవత్సరపు రాశిఫలాలు, ఆదాయ-వ్యయాలు, రాజపూజ్యావమానాలు వంటి అంశాలను వినడం ఒక ముఖ్యమైన ఆచారంగా కొనసాగుతోంది.
