Last Updated:
ధురంధర్.. ది రివెంజ్ (ధురంధర్ 2) ఉగాది కానుకగా విడుదలై, విశాఖలో హంగామా సృష్టిస్తోంది. రణ్వీర్ సింగ్, సంజయ్ దత్, ఆర్. మాధవన్, అక్షయ్ ఖన్నా, అర్జున్ రాంపాల్ నటించారు.
ప్రపంచవ్యాప్తంగా థియేటర్లలో గ్రాండ్గా విడుదలైన ధురంధర్.. ది రివెంజ్ (ధురంధర్ 2) సినిమా ప్రేక్షకులను ఆకట్టుకుంటూ ఉగాది కానుకగా భారీ హంగామా సృష్టిస్తోంది. ముఖ్యంగా విశాఖలో ఈ సినిమా కోసం అభిమానులు థియేటర్లకు పోటెత్తారు. సినిమా చూసిన వెంటనే ఫ్యాన్స్ సోషల్ మీడియాలో తమ అభిప్రాయాలను పంచుకుంటూ, “ఇది బాక్సాఫీస్ను దున్నేసే సినిమా” అంటూ ప్రశంసల వర్షం కురిపిస్తున్నారు.
ఈ మల్టీస్టారర్ మూవీలో రణ్వీర్ సింగ్, సంజయ్ దత్, ఆర్. మాధవన్, అక్షయ్ ఖన్నా, అర్జున్ రాంపాల్ వంటి స్టార్ నటులు కీలక పాత్రల్లో కనిపించారు. దర్శకుడు ఆదిత్య ధర్ తన దర్శకత్వ ప్రతిభతో సినిమాను మరో లెవెల్కు తీసుకెళ్లాడని ప్రేక్షకులు చెబుతున్నారు. మొదటి భాగం సృష్టించిన ప్రభంజనం తర్వాత వచ్చిన ఈ సీక్వెల్పై భారీ అంచనాలు ఉండగా, వాటిని ఈ సినిమా నిలబెట్టిందని అభిమానులు అభిప్రాయపడుతున్నారు.
దేశభక్తి, గూఢచారి వ్యవస్థ నేపథ్యంతో సాగే ఈ కథలో జస్కిరత్ సింగ్ రంగీ పాత్రలో రణ్వీర్ సింగ్ తన టీమ్తో కలిసి సరిహద్దుల అవతల ఉన్న ఉగ్రవాద మూలాలను ఎలా ఛేదించాడు అన్నది ప్రధానంగా చూపించారు. మొదటి భాగంలో మిషన్పై దృష్టి పెట్టిన దర్శకుడు, రెండో భాగంలో రివెంజ్ డ్రామాను జోడించి కథను మరింత ఎమోషనల్గా మలిచాడని ప్రేక్షకులు చెబుతున్నారు. యాక్షన్ సీన్లు, ట్విస్టులు, బ్యాక్గ్రౌండ్ స్కోర్ అన్నీ కలిపి సినిమా ప్రేక్షకులను నాలుగు గంటల పాటు సీటుకు అతుక్కుపోయేలా చేశాయని అభిమానులు అంటున్నారు.
అయితే కొంతమంది ప్రేక్షకులు మాత్రం “ధురంధర్ 2 బాగానే ఉన్నా, ఫస్ట్ పార్ట్ స్థాయికి చేరలేదు” అని అభిప్రాయపడుతున్నారు. అయినప్పటికీ మొత్తం మీద సినిమా పాజిటివ్ టాక్తో దూసుకుపోతోందని ట్రేడ్ వర్గాలు చెబుతున్నాయి. హిందీలో చూసిన వారు “తెలుగులో కూడా తప్పకుండా చూస్తాం” అని చెబుతుండటం ఈ సినిమాకు ఉన్న క్రేజ్ను స్పష్టం చేస్తోంది.
ఈ సినిమాను ఫ్యామిలీతో కలిసి చూడదగ్గ ఎంటర్టైనర్గా పలువురు పేర్కొంటున్నారు. ముఖ్యంగా మహిళలు కూడా అధిక సంఖ్యలో థియేటర్లకు రావడం గమనార్హం. యాక్షన్తో పాటు ఎమోషన్, దేశభక్తి అంశాలు కలిసిన ఈ చిత్రం అన్ని వర్గాల ప్రేక్షకులను ఆకట్టుకుంటోందని ఫ్యాన్స్ చెబుతున్నారు. ఉగాది రోజున ఈ సినిమా విడుదల కావడం తమకు మరింత ఆనందం ఇచ్చిందని, ఎంతోకాలంగా ఎదురుచూస్తున్న మూవీ కావడంతో థియేటర్లలో చూసిన అనుభూతి ప్రత్యేకంగా ఉందని అంటున్నారు.
మొత్తంగా ఉగాది పండుగకు సరైన ఎంటర్టైన్మెంట్ ప్యాకేజ్గా వచ్చిన ‘ధురంధర్ 2’ ప్రస్తుతం బాక్సాఫీస్ వద్ద దూసుకుపోతూ, భారీ కలెక్షన్ల దిశగా అడుగులు వేస్తోంది. యాక్షన్, ఎమోషన్, స్టార్ పవర్ ఇలా అన్నీ కలిసిన ఈ సినిమా ప్రతి ఒక్కరూ తప్పకుండా చూడాల్సిన చిత్రంగా ప్రేక్షకులు సూచిస్తున్నారు.
Click here to add News18 as your preferred news source on Google. ఆంధ్రప్రదేశ్లోని ముఖ్యమైన వార్తలు, లేటెస్ట్ న్యూస్, స్థానిక వార్తలు, ప్రభుత్వ పథకాలు, ప్రభుత్వ ప్రకటనలు, అన్ని రాజకీయ పార్టీలకు సంబంధించిన స్టోరీలను న్యూస్18 తెలుగు ఆంధ్రప్రదేశ్ కేటగిరీలో చదవండి. మరిన్ని వార్తల కోసం న్యూస్ 18 తెలుగు ఫాలో అవండి.
Visakhapatnam,Andhra Pradesh
