Last Updated:
మహమ్మద్ ఇర్ఫా పాయకరావుపేటకు చెందిన వ్యక్తి, కాకినాడ జిల్లాలో నివసిస్తూ నిరుపేదలకు సహాయం చేస్తూ ‘సాయిబు గారు’గా ప్రసిద్ధి చెందారు. తన సంపాదనలో కొంత భాగాన్ని దానంగా ఇచ్చి, మానవత్వంతో జీవిస్తున్నారు.
కులం, మతం అనే సరిహద్దులను చెరిపేసి, మానవత్వమే పరమావధిగా జీవిస్తున్న అరుదైన వ్యక్తి మహమ్మద్ ఇర్ఫా. సాధారణంగా దానధర్మాలు అంటే కోటీశ్వరులు చేస్తారని మనం అనుకుంటాం, కానీ ఇర్ఫా గారు మాత్రం తన వృత్తి ద్వారా వచ్చే సంపాదనలో కొంత భాగాన్ని నిరుపేదల కోసం వెచ్చించడమే కాకుండా, తనకున్నదానిలో ఎంతో కొంత పంచుతూ ‘సాయిబు గారు’ అని ఆ ప్రాంత ప్రజల చేత దేవుడిగా కొలవబడుతున్నారు. అనకాపల్లి జిల్లా పాయకరావుపేటకు చెందిన ఇర్ఫా, వృత్తిరీత్యా కాకినాడ జిల్లాలో నివసిస్తున్నారు. ప్రతిరోజూ ఉదయం వైట్ అండ్ వైట్ దుస్తుల్లో, తన బుల్లెట్ బైక్ లేదా స్కూటీపై ఎంతో దర్జాగా, స్టైలిష్గా ఆయన సాగించే ప్రయాణం కేవలం ఉద్యోగం కోసమే కాదు, ఆకలితో అలమటించే వందలాది మందికి ఆశను పంచడానికి.
గత తొమ్మిదేళ్లుగా ఆయన ఈ సేవా కార్యక్రమాన్ని అవిచ్ఛిన్నంగా కొనసాగిస్తున్నారు. పాయకరావుపేట నుంచి కాకినాడకు సాగే ఆయన ప్రయాణంలో సుమారు 5 నుంచి 8 సెంటర్ల వద్ద ఆయన వాహనం ఆగుతుంది. ఆయన బుల్లెట్ ఆగిందంటే చాలు, అక్కడ ఎదురుచూస్తున్న నిరుపేదలు, బిక్షాటకులు, కార్మికులు పరుగులు తీస్తూ ఆయన వద్దకు చేరుకుంటారు. ఆయన కుడివైపు ఉండే హ్యాండ్బ్యాగ్లో ఎప్పుడూ నగదు కట్టలు సిద్ధంగా ఉంటాయి. రోజుకు కనీసం వెయ్యి రూపాయలకు పైగా ఆయన నిస్సహాయులకు పంచుతుంటారు. కేవలం డబ్బులే కాకుండా, అవసరమైన వారికి భోజనం, వస్త్రాలను ఆయన స్వయంగా సమకూరుస్తుంటారు.
ఆయన ఓ గొప్ప ధనవంతుడు కాదు, ఒక సాధారణ వ్యక్తి. తన కుటుంబ బాధ్యతలు పూర్తయిన తర్వాత, తన సంపాదనను ఇతరుల ఆకలి తీర్చడానికే కేటాయించడం ఆయనలోని గొప్పతనానికి నిదర్శనం. “ఈ భూమిపై ఉన్నంత కాలం మరొక జీవికి ఉపయోగపడడమే నిజమైన జీవితం, దాచినంత మాత్రాన పెరిగేది ఏమీ ఉండదు” అని ఆయన తరచుగా చెబుతుంటారు. మతం ఏదయినా, చేసే పని మానవత్వంతో కూడి ఉంటే అదే దైవత్వం అని ఇర్ఫా గారు నిరూపిస్తున్నారు.
ఆయన నిరాడంబరతను, సేవా నిరతిని చూసి స్థానికులు ఆయనను “మా దేవుడు సాయిబు గారు” అని పిలుచుకుంటారు. నేటి సమాజంలో ఇటువంటి ఆదర్శ వ్యక్తుల అవసరం ఎంతో ఉంది. ‘నావాడు, నీవాడు’ అనే భేదం లేకుండా, సమాజంలోని నిరుపేదల కన్నీళ్లను తుడవడమే లక్ష్యంగా సాగుతున్న మహమ్మద్ ఇర్ఫా గారి జీవనశైలి ప్రతి ఒక్కరికీ స్ఫూర్తిదాయకం. ఇలాంటి వ్యక్తులను ఆదర్శంగా తీసుకుని, తమకు తోచినంతలో పదిమందికి సాయం చేసే సంస్కృతిని పెంచుకోవాలని స్థానికులు కోరుతున్నారు. పదిమందికి ఉపయోగపడే మనిషిగా జీవించడం వల్లే జీవితానికి సార్థకత చేకూరుతుందని ఆయన తన జీవనం ద్వారా చాటి చెబుతున్నారు.
Click here to add News18 as your preferred news source on Google. ఆంధ్రప్రదేశ్లోని ముఖ్యమైన వార్తలు, లేటెస్ట్ న్యూస్, స్థానిక వార్తలు, ప్రభుత్వ పథకాలు, ప్రభుత్వ ప్రకటనలు, అన్ని రాజకీయ పార్టీలకు సంబంధించిన స్టోరీలను న్యూస్18 తెలుగు ఆంధ్రప్రదేశ్ కేటగిరీలో చదవండి. మరిన్ని వార్తల కోసం న్యూస్ 18 తెలుగు ఫాలో అవండి.
Hyderabad,Telangana
