Ugadi Brahmotsavam 2026: మలన్న దర్శనం కోసం ఎండలో వందల కిలో మీటర్ల కాలినడక.. శ్రీశైలంకి కన్నప్పలు |

తిరుమల శ్రీవేంకటేశ్వరస్వామిని దర్శించుకోవాలంటే ఏడు కొండలు ఎక్కాలి. అదే శ్రీశైలం మల్లన్నను దర్శించుకోవాలంటే ఆడవి మార్గంలో గుట్టలు, కొండలు, ఎండని తట్టుకొని దర్శించుకోవాల్సి ఉంటుంది. అందులో శ్రీశైలంలో ప్రత్యేక కార్యక్రమాలు జరిగే సమయంలో భక్తులు లక్షలాదిగా తరలివస్తుంటారు. ఈనెల 16 నుండి 20 వరకు ఉగాది మహోత్సవాలు జరగనున్నాయి. ఈ ఉత్సవాలను తిలకించడానికి కర్నాటక రాష్ట్రంలోని కన్నడిగులు కన్నప్పను దర్శించుకోవడానికి పాదయాత్రగా 300-400 కిలోమీటర్ల దూరం నుండి వస్తున్నారు. అటవీ మార్గాలైన వెంకటాపురం, భీమునికొలను మీదుగా క్షేత్రానికి చేరుకుంటున్నారు.

మండిపోతున్న ఎండలను దృష్టిలో పెట్టుకొని శ్రీశైలం వచ్చే భక్తులకు ఎలాంటి ఇబ్బంది కలగకుండా ఆలయ ఈవో (EO) ఎస్. శ్రీనివాసరావు ప్రత్యేక ఏర్పాట్లు చేశారు. మార్గం మధ్యలో మజ్జిగ, మంచినీళ్లతో పాటు అల్పాహారం అందజేస్తున్నారు. ఇక ఆలయ ప్రాంగణంలో చలువ పందిళ్లు వేస్తున్నారు. క్యూ లైన్లలో, అటవీ మార్గాల్లో భక్తులకు ఎండ తగలకుండా చలువ పందిళ్లు వేశారు.

కర్నాటక నుండి వచ్చే కన్నడ భక్తులు శ్రీశైలంలో కొలువైన భ్రమరాంబ దేవిని తమ ఇంటి ఆడపడుచుగా,మల్లికార్జున స్వామిని తమ ఇంటి అల్లుడిగా భావిస్తారు.అందుకే ప్రతి సంవత్సరం ఉగాది సమయానికి లక్షలాది మంది కన్నడిగులు వేసవి ఎండలను భరించి పాదయాత్రగా శ్రీశైలం చేరుకుంటారు. కొంతమంది భక్తులు సుమారు నెల రోజులపాటు పాదయాత్ర చేస్తూ శ్రీశైల క్షేత్రానికి చేరుకుంటారు.

వందల మైళ్ల దూరం నుంచి వచ్చే భక్తులు నీరసం, అస్వస్థతకు గురైతే చికిత్స అందించడానికి ఎక్కడిక్కడ వైద్య శిబిరాలు ఏర్పాటు చేశారు. అత్యవసర చికిత్స కోసం ముఖ్యమైన పాయింట్ల వద్ద వైద్య బృందాలను అందుబాటులో ఉంచారు. కన్నడ భక్తులకు మార్గనిర్దేశం చేసేందుకు కన్నడ భాష తెలిసిన వాలంటీర్లను అదనంగా నియమించారు. ఉత్సవాల రద్దీ కారణంగా మార్చి 16 నుంచి 20 వరకు గర్భాలయ స్పర్శ దర్శనాలు నిలిపివేయబడతాయి. కేవలం అలంకార దర్శనం మాత్రమే ఉంటుంది.

ఈనెల 16న ధ్వజారోహణంతో ఉత్సవాల ప్రారంభం. బృంగి వాహన సేవ, అమ్మవారికి మహాలక్ష్మి అలంకారం.

శివరాత్రి బ్రహ్మోత్సవాల సమయంలో భక్తులకు జరిగిన అసౌకర్యాలను దృష్టిలో పెట్టుకొని ఈసారి మరింత జాగ్రత్తగా ఏర్పాట్లు చేసారు ఆలయ అధికారులు. భక్తులు కూడా వేసవి తీవ్రతను దృష్టిలో పెట్టుకొని సహాకరించాలని కోరుతున్నారు.