పక్షుల దాహం తీర్చే మహాయజ్ఞం.. విశాఖలో 20 వేల మట్టి పాత్రల ఏర్పాటు..! Green Climate Team program to quench thirst of animals in Visakha. | విశాఖపట్నం వార్తలు (Visakhapatnam News)

విశాఖపట్నంలోని ఎంవిపి కాలనీలో ఉన్న ఆళ్వార్ దాస్ డిగ్రీ కళాశాల మైదానంలో ప్రిన్సిపాల్ డాక్టర్ జగదీష్ అధ్యక్షతన మట్టి పాత్రల్లో నీటిని ఏర్పాటు చేశారు. ఈ సందర్భంగా మాట్లాడిన జెవి రత్నం, ఈ ఏడాది కనీసం 20 వేల మట్టి పాత్రలు ఏర్పాటు చేయాలని లక్ష్యంగా పెట్టుకున్నామని వెల్లడించారు. విశాఖలో ప్రతి ఇంటి ముందూ ఒక నీటి పాత్ర ఉండాలని ఆయన ఆకాంక్షించారు.

పక్షుల కోసం కేవలం నీరే కాదు, చిరుధాన్యాలు కూడా అందుబాటులో ఉంచాలని కోరారు. అడవులు, కొండలు, తీర ప్రాంతాల్లో వర్షాకాలంలో చిరుధాన్యాలు చల్లి పక్షులకు ఆహారం అందించే ప్రయత్నాలు చేయాలని సూచించారు. ఇప్పటికే నగరంలోని పలు ప్రాంతాల్లో విద్యార్థులతో కలిసి అవగాహన కార్యక్రమాలు నిర్వహించామని, కొంతమందికి ఇంటి వద్ద పక్షులకు నీళ్లు పెట్టేందుకు మట్టి ప్రమిదలను ఉచితంగా పంపిణీ చేశామని తెలిపారు.

వేసవిలో నీటి కోసం అడవుల నుంచి బయటకు వచ్చే వన్యప్రాణులు వేటగాళ్ల బారిన పడకుండా ప్రభుత్వం చర్యలు తీసుకోవాలని జెవి రత్నం విజ్ఞప్తి చేశారు. రాష్ట్ర, కేంద్ర ప్రభుత్వాలు అలాగే జిల్లా అధికారులు స్పందించి పశుపక్ష్యాదులకు తగిన నీటి వసతులు కల్పించాలని కోరారు.

ఈ కార్యక్రమంలో మ్యాంగో మేన్ అప్పాజీ, స్వాంతన సేవా సంస్థ ప్రతినిధి ప్రజ్ఞాన్ కుమార్, గ్రీన్ క్లైమేట్ టీం వాలంటీర్ జె రాజేశ్వరి, పలువురు ఉపాధ్యాయులు, విద్యార్థులు పాల్గొని తమ సందేశాలు ఇచ్చారు. “ఒక్క గిన్నె నీరు ఒక ప్రాణాన్ని కాపాడుతుంది” అనే భావంతో ప్రతి ఒక్కరూ తమ ప్రాంతంలో పక్షులు, జంతువులను రక్షించేందుకు ముందుకు రావాలని నిర్వాహకులు పిలుపునిచ్చారు.