QR Codes for Every House: ప్రతి ఇంటికి క్యూఆర్ కోడ్.. ఏపీ ప్రభుత్వం కొత్త ప్లాన్.. టెక్నాలజీని వాడేస్తోందిగా! | ఆంధ్రప్రదేశ్ వార్తలు

ప్రభుత్వం త్వరలో రాష్ట్రంలోని నగరాలు, పట్టణాల్లోని ప్రతి ఇంటికీ, అపార్ట్‌మెంట్‌కీ, షాపింగ్ కాంప్లెక్సులు, చిన్న షాపులు.. ఇలా అన్నింటికీ క్యూఆర్ కోడ్‌లను ఇవ్వనుంది. వాటిని అక్కడే అంటించనుంది. ఇలా మొత్తం 45 లక్షల క్యూఆర్ కోడ్‌లను అతికించేందుకు ప్రభుత్వం రెడీ అవుతోంది. అంటే త్వరలో మనం ఎక్కడ చూసినా క్యూఆర్ కోడ్‌లే కనిపిస్తాయి. గుడిలో, బడిలో, ఆస్పత్రిలో, షాపుల్లో, ఇళ్లలో అంతా క్యూఆర్ మయం అవుతుందిు.

త్వరలో మన ఇళ్లకు మున్సిపల్ అధికారులు లేదా సిబ్బంది వస్తారు. ఎక్కడ క్యూఆర్ కోడ్ అతికించాలో చూస్తారు. వర్షం పడకుండా, పాడవకుండా ఉండే చోటు చూసి.. అక్కడ క్యూఆర్ కోడ్ స్టిక్కర్ అంటిస్తారు. మామూలుగా మనం షాపుల్లో క్యూఆర్ కోడ్ స్కాన్ చేస్తే.. ఎంత డబ్బు చెల్లించాలో కనిపిస్తుంది. కానీ.. మన ఇళ్లకు అంటించే క్యూఆర్ కోడ్ అలాంటిది కాదు. అది మరో రకం.. దాన్ని స్కాన్ చేస్తే.. మన ఇంటి వివరాలన్నీ అందులో కనిపిస్తాయి. మన ఆస్తుల వివరాలు తెలుస్తాయి. ఎంత టాక్స్ చెల్లించాలి, ఇదివరకు ఎంత చెల్లించారు? ఎవరైనా చెల్లించకుండా పెండింగ్ ఉంచారా, ట్రేడ్ లైసెన్స్ ఫీజ్ పెండింగ్ ఉందా వంటివి తెలుస్తాయి. అప్పుడు వెంటనే చెల్లింపులు చెయ్వవచ్చు. అంతా క్షణాల్లో అయిపోతుంది.

క్యూఆర్ కోడ్ విధానం నిజానికి కేంద్ర ప్రభుత్వానిది. కేంద్రం దీన్ని సిటీ సర్వీసెస్ అనే పేరుతో నిర్వహిస్తోంది. దీన్ని పూర్తిగా అమల్లోకి తేవడం ద్వారా.. మీసేవా కేంద్రాల అవసరాన్ని తగ్గించేలా ప్లాన్ ఉంది. అప్పుడు ప్రజలు మున్సిపల్ ఆఫీసులు, మీసేవా కేంద్రాలకు వీలైనంతవరకూ వెళ్లాల్సిన అవసరం ఉండదు. ప్రస్తుతం ఈ క్యూఆర్ కోడ్ల తయారీ పనులు జరుగుతున్నాయి. దశలవారీగా రాష్ట్రమంతా ఈ కార్యక్రమాన్ని అమలుచేస్తారు. అందుకు కచ్చితమైన తేదీని ఇంకా ప్రకటించలేదు.