విజృంభిస్తున్న సీజనల్ జ్వరాలు.. ఆ జిల్లాలో రోజుకు 25 పైగా కేసులు.. వైద్యుల హెచ్చరిక..! Doctors warn sudden rise of viral fevers in Visakha. | విశాఖపట్నం వార్తలు (Visakhapatnam News)

విశాఖపట్నం నగరంలో ప్రస్తుతం సీజనల్ వైరల్ ఫీవర్స్ ఎక్కువగా నమోదవుతున్నాయి. రోజుకు సగటున 20 నుంచి 30 వరకు కేసులు నమోదవుతున్నట్లు వైద్యులు చెబుతున్నారు. కేజీహెచ్ వైరాలజీ ల్యాబ్‌కు ప్రతిరోజూ 20 నుంచి 30 వరకు శాంపిల్స్ పరీక్షలకు వస్తుండగా, వాటిలో ఎక్కువగా వైరల్ ఫీవర్స్‌నే గుర్తిస్తున్నట్లు వైద్య ఆరోగ్యశాఖ అధికారులు తెలిపారు. డెంగ్యూ, మలేరియా వంటి తీవ్రమైన వ్యాధులు తక్కువగానే ఉన్నప్పటికీ వైరల్ జ్వరాలతో బాధపడుతున్న వారి సంఖ్య మాత్రం గణనీయంగా పెరిగినట్లు తెలుస్తోంది.

వైరల్ ఫీవర్స్ వచ్చినప్పుడు జ్వరం, జలుబు, దగ్గు, కీళ్ల నొప్పులు, అలసట, నీరసం వంటి లక్షణాలు కనిపిస్తున్నాయని వైద్యులు చెబుతున్నారు. పెద్దగా ప్రమాదకరం కాకపోయినా ఈ లక్షణాలను నిర్లక్ష్యం చేయకూడదని హెచ్చరిస్తున్నారు. కొంతమంది స్వయంగా మందులు వేసుకుని ఆలస్యంగా ఆసుపత్రికి వస్తుండటంతో సమస్యలు ఎక్కువవుతున్నాయని వైద్యులు సూచిస్తున్నారు. ప్రారంభ దశలోనే చికిత్స తీసుకుంటే త్వరగా కోలుకునే అవకాశం ఉంటుందని చెబుతున్నారు.

వైరల్ జ్వరాలతో ఆసుపత్రులకు వచ్చే రోగుల కోసం విశాఖలోని కేజీహెచ్, విమ్స్ వంటి ఆసుపత్రుల్లో ప్రత్యేక వైద్య బృందాలను ఏర్పాటు చేశారు. రోగులకు వెంటనే చికిత్స అందించేలా చర్యలు తీసుకుంటున్నారు. ప్రస్తుతం నమోదవుతున్న కేసుల్లో ఎక్కువగా వాతావరణ మార్పుల కారణంగా వచ్చే వైరల్ ఇన్ఫెక్షన్లేనని వైద్యులు స్పష్టం చేస్తున్నారు. మార్చి రెండో వారం తర్వాత ఈ జ్వరాలు కొంత తగ్గుముఖం పట్టే అవకాశం ఉందని అంచనా వేస్తున్నారు.

జ్వరాలు నివారించాలంటే తగిన జాగ్రత్తలు తీసుకోవాలని వైద్యులు సూచిస్తున్నారు. రోజూ గోరువెచ్చని నీళ్లు ఎక్కువగా తాగడం, శరీరానికి విశ్రాంతి ఇవ్వడం, బయటకు వెళ్లేటప్పుడు జాగ్రత్తలు పాటించడం అవసరమని చెబుతున్నారు. దోమలు ఎక్కువగా ఉన్న ప్రాంతాల్లో దోమతెరలు ఉపయోగించడం మంచిదని సూచిస్తున్నారు. అవసరమైతే మాస్క్ ధరించడం, శుభ్రత పాటించడం కూడా వైరల్ జ్వరాల నుంచి రక్షణ కల్పిస్తాయని వైద్యులు చెబుతున్నారు. ప్రమాదకరం కాకపోయినా సీజనల్ జ్వరాలను నిర్లక్ష్యం చేయకుండా వెంటనే వైద్యులను సంప్రదించడం మంచిదని నిపుణులు సూచిస్తున్నారు.