“నాన్న లేడు.. నేను ఉన్నా”.. నానమ్మకు తలకొరివి పెట్టిన మనవరాలు.. కన్నీరు పెట్టిస్తున్న ఘటన..! women performing last rites,. | ఈస్ట్ గోదావరి వార్తలు (East Godavari News)

రాజోలు మండలం రాజోలు గ్రామంలోని సుందరమ్మ చెరువు గట్టు ప్రాంతానికి చెందిన గాలిదేవర సత్యవేణి (75) కిడ్నీ సంబంధిత అనారోగ్యంతో మృతి చెందారు. అయితే ఆమెకు కుమారుడు లేకపోవడం కాదు.. ఉన్న ఒక్కగానొక్క కుమారుడు శ్రీనివాస్‌రావు 2021లో కరోనా మహమ్మారి కారణంగా మరణించాడు. ఆ తర్వాత ఈ కుటుంబానికి పెద్ద దిక్కుగా నిలిచింది ఆయన చిన్న కుమార్తె రేణుక. ప్రస్తుతం అవివాహితగా నానమ్మతోనే ఉంటున్న ఆమె.. నానమ్మ మృతితో తీవ్ర భావోద్వేగానికి గురైంది.

అంత్యక్రియల సమయంలో కుటుంబంలో మగవారు లేకపోవడంతో రేణుక ధైర్యంగా ముందుకొచ్చింది. కన్నీళ్లు ఆపుకుంటూనే నానమ్మకు తలకొరివి పెట్టి చివరి సంస్కారాలు నిర్వహించింది. నా తండ్రి ఉండి ఉంటే ఈ బాధ్యత ఆయనదే.. ఇప్పుడు ఆయన లేరు కాబట్టి ఆయన స్థానంలో నేనే ఈ కర్తవ్యం చేస్తున్నా అంటూ రేణుక కన్నీటి పర్యంతమైంది. తన తండ్రి కరోనా సమయంలో మరణించగా చివరి చూపు కూడా చూడలేకపోయానని గుర్తు చేసుకుంటూ ఆవేదన వ్యక్తం చేసింది.

స్మశానానికి వెళ్లి నానమ్మకు తలకొరివి పెట్టిన రేణుకను చూసిన గ్రామస్తులు, బంధువులు భావోద్వేగానికి గురయ్యారు. పేగు బంధానికి ఆడ, మగ అనే తేడా ఉండదని.. ప్రేమ, బాధ్యతే ముఖ్యమని ఈ ఘటన మరోసారి చాటి చెప్పిందని పలువురు అభిప్రాయపడుతున్నారు. మగబిడ్డలే పితృరుణం తీర్చాలి అనే పాత ఆలోచనలకు భిన్నంగా.. ఇప్పుడు ఆడబిడ్డలూ కుటుంబ బాధ్యతలను ధైర్యంగా తీసుకుంటున్నారని చెబుతున్నారు.

సామాజికంగా మారుతున్న పరిస్థితుల్లో ఆడబిడ్డలు ప్రతి రంగంలో ముందంజలో నిలుస్తున్న సమయంలో.. ఇలాంటి ఘటనలు సమాజానికి కొత్త సందేశాన్ని ఇస్తున్నాయని స్థానికులు అంటున్నారు. కన్నవారిని చివరి ప్రయాణంలో సాగనంపడం ప్రేమకు, బంధానికి సంబంధించిన విషయం తప్ప లింగభేదానికి కాదని రేణుక చేసిన పని ప్రతి ఒక్కరినీ ఆలోచింపజేస్తోంది.