World Earth Day: బాదంపప్పు బద్దపై ‘భూమాత క్షోభ’.. ధరిత్రి దినోత్సవం వేళ నంద్యాల కళాకారుడి అద్భుత సృజన! |

నేడు ప్రపంచవ్యాప్తంగా పర్యావరణ మార్పులు పెను సవాలుగా మారాయి. మానవుడి స్వార్థం వల్ల భూమి వేడెక్కిపోతోంది. ఈ విపత్కర పరిస్థితులను కళ్లకు కట్టేలా నంద్యాల చిత్రకారుడు కోటేష్ గారు బాదంపప్పుపై అద్భుతమైన సూక్ష్మ చిత్రాలను రూపొందించారు. కేవలం మైక్రో బ్రష్‌లు, వాటర్ కలర్స్‌తో ఒకే గంటలో 40 రకాల విభిన్న చిత్రాలను చిత్రీకరించడం ఆయన అసమాన ప్రతిభకు నిదర్శనం.

ఈ సూక్ష్మ చిత్రాల్లో ప్రధానంగా భూమాత తన ఉనికిని కాపాడుకోవాలని, పర్యావరణాన్ని రక్షించాలని చేతులు జోడించి వేదనతో వేడుకుంటున్నట్లు చిత్రీకరించారు. మానవుల నిర్వాకం వల్ల ప్రకృతి ఎలా విలవిలలాడుతుందో చెప్పేందుకు ఆయన ఎంచుకున్న చిత్రాలు ప్రతి ఒక్కరినీ ఆలోచింపజేస్తాయి. అడవులు నరికివేయడంతో ఆహారం, నీరు లభించక వన్యప్రాణులు అలమటించిపోతూ భూమాతకు మొరపెట్టుకుంటున్న దృశ్యాలు హృదయవిదారకంగా ఉన్నాయి.

ఎండిపోయిన వృక్షాలు, నరికివేసిన దుంగలు, ఆహారం దొరకక చనిపోయిన జంతువులు, మనుషుల కళేబరాలు రేపటి భయానక భవిష్యత్తును సూచిస్తున్నాయి. ఒక నీటి బొట్టులో చెట్టు ఉన్నట్లు చిత్రీకరించిన చిత్రం.. “నీరు ఉంటేనే చెట్టు, చెట్టు ఉంటేనే ప్రాణికోటి” అనే సందేశాన్ని బలంగా పంపిస్తోంది.

ఈ సందర్భంగా కోటేష్ మాట్లాడుతూ, భూమి సకల జీవరాశులకు నిలయమని, కానీ మనిషి తన అవసరాల కోసం అడవులను నరికివేస్తూ పర్యావరణ సమతుల్యాన్ని దెబ్బతీస్తున్నాడని ఆవేదన వ్యక్తం చేశారు. వాతావరణంలో వచ్చిన మార్పుల వల్ల ఎండలు విపరీతంగా పెరగడం, ప్రకృతి వైపరీత్యాలు సంభవించడం వంటివి భూమి పట్ల మనం చూపిస్తున్న నిర్లక్ష్యానికి ఫలితాలేనని ఆయన పేర్కొన్నారు.

పర్యావరణ పరిరక్షణపై కేవలం స్వచ్ఛంద సంస్థలు లేదా కళాకారులే కాకుండా, ప్రభుత్వం ప్రత్యేక దృష్టి సారించాలని కోటేష్ కోరారు. ప్రజల్లో అవగాహన కల్పించే కార్యక్రమాలను క్షేత్రస్థాయిలో చేపట్టాలని, భూమిని ఒక “అక్షయపాత్ర” లా భావించి కాపాడుకోవాలని ఆయన తెలియజేశారు.

“నేను ఈ చిత్రాలను వేసిన బాదంపప్పు భూమి నుంచి వచ్చినదే” అని కోటేష్ చెప్పిన మాటలు మన మూలాలను గుర్తు చేస్తున్నాయి. మనకు సర్వస్వాన్ని ఇస్తున్న భూమాతను కాపాడుకోకపోతే, భవిష్యత్తు తరాలకు మనం ఒక ఎడారిని ఇచ్చిన వారమవుతాం.