Last Updated:
విశాఖపట్నం ఫిషింగ్ హార్బర్లో వేసవి వేట నిషేధంతో ఎండు చేపల డిమాండ్, రొయ్యలు వంజరం ధరలు భారీగా పెరుగగా, నిపుణులు వీటి ఆరోగ్య ప్రయోజనాలు చెబుతున్నారు
విశాఖపట్నం ఫిషింగ్ హార్బర్.. తాజా చేపల వేటకు, మత్స్యకారుల సందడికి నిలయం. ఏ పండగ వచ్చినా, సెలవు దినం వచ్చినా వైజాగ్ వాసులందరి చూపు ఈ హార్బర్ పైనే ఉంటుంది. అయితే, వేసవి కాలం వచ్చిందంటే చాలు ఇక్కడి వాతావరణం ఒక్కసారిగా మారిపోతుంది. ఏప్రిల్ నుండి దాదాపు రెండు నెలల పాటు సముద్రంలో చేపల వేటపై నిషేధం ఉండటంతో బోట్లన్నీ తీరానికే పరిమితమవుతాయి. సముద్రంలోకి వెళ్లే అవకాశం లేకపోవడంతో తాజా చేపల లభ్యత తగ్గిపోతుంది. సరిగ్గా ఇదే సమయంలో విశాఖ హార్బర్లో ‘ఎండు చేపల’ సామ్రాజ్యం మొదలవుతుంది. తాజా చేపలు దొరకని ఈ రెండు నెలలు మత్స్య ప్రియులందరూ ఎండు చేపల వైపే మొగ్గు చూపుతారు. దీంతో వీటికి మార్కెట్లో విపరీతమైన డిమాండ్ ఏర్పడుతుంది.
ధరల విషయానికి వస్తే, ఎండు చేపల రేట్లు సామాన్యులకు చుక్కలు చూపిస్తున్నాయి. ప్రస్తుతం మార్కెట్లో రొయ్య పొట్టు కేజీ రూ. 350 పలుకుతుండగా, ఎండు రొయ్యలు రూ. 550, వంజరం ఏకంగా రూ. 1200 వరకు విక్రయిస్తున్నారు. ఇక పండుగప్ప రూ. 1000, బొమ్మిడాలు రూ. 250, నత్తలు కేజీ రూ. 400 నుండి 500 వరకు ఉన్నాయి. వేట నిషేధం అమల్లోకి రాగానే ఈ ధరలు మరింత పెరిగే అవకాశం ఉందని, ప్రతి వెరైటీపై కేజీకి రూ. 150 నుండి 200 వరకు రేట్లు పెరగవచ్చని మత్స్యకారులు చెబుతున్నారు. రేట్లు అధికంగా ఉన్నప్పటికీ, ఎండు చేపల రుచికి అలవాటు పడిన వారు మాత్రం ఏ మాత్రం వెనకాడకుండా వీటిని కొనుగోలు చేస్తున్నారు.
చాలామంది ఎండు చేపలను వాటి ఘాటైన వాసన కారణంగా దూరం పెడుతుంటారు. కానీ, ఆ వాసన వెనుక అద్భుతమైన ఆరోగ్య రహస్యాలు దాగి ఉన్నాయని వైద్యులు మరియు స్థానిక మత్స్యకారులు స్పష్టం చేస్తున్నారు. ఎండు చేపల్లో ప్రోటీన్లు, యాంటీ ఆక్సిడెంట్లు పుష్కలంగా ఉంటాయి. వీటిలో ఉండే పొటాషియం, ఫాస్ఫరస్, సెలీనియం, నియాసిన్ మరియు విటమిన్ బి12 మన శరీరానికి ఎంతో మేలు చేస్తాయి.
తరచూ ఎండు చేపలను ఆహారంలో తీసుకోవడం వల్ల రక్తపోటు (BP) నియంత్రణలో ఉండటమే కాకుండా, నరాల బలహీనత వంటి సమస్యలు దరిచేరవని నిపుణులు చెబుతున్నారు. కండరాల నిర్మాణానికి మరియు చర్మం పొడిబారకుండా ఉండటానికి ఇవి ఎంతో దోహదపడతాయి. తక్కువ సోడియం మరియు సంతృప్త కొవ్వు ఆమ్లాలు ఉండటం వల్ల ఇవి గుండె ఆరోగ్యానికి కూడా మేలు చేస్తాయి. కాబట్టి, మీరు విశాఖ హార్బర్ వైపు వెళ్తే.. కేవలం వాసన చూసి వదిలేయకుండా, ఆరోగ్యాన్నిచ్చే ఈ ఎండు చేపలను ఒకసారి తప్పక ట్రై చేయండి.
Click here to add News18 as your preferred news source on Google. ఆంధ్రప్రదేశ్లోని ముఖ్యమైన వార్తలు, లేటెస్ట్ న్యూస్, స్థానిక వార్తలు, ప్రభుత్వ పథకాలు, ప్రభుత్వ ప్రకటనలు, అన్ని రాజకీయ పార్టీలకు సంబంధించిన స్టోరీలను న్యూస్18 తెలుగు ఆంధ్రప్రదేశ్ కేటగిరీలో చదవండి. మరిన్ని వార్తల కోసం న్యూస్ 18 తెలుగు ఫాలో అవండి.
Visakhapatnam,Andhra Pradesh
Apr 30, 2026 10:51 PM IST
