తన దూకుడైన బ్యాటింగ్తో అభిమానులను ఆకట్టుకుంటున్న వైభవ్ సూర్యవంశీ మరోసారి అద్భుత ప్రదర్శన కనబరిచాడు. ఐపీఎల్ 2026 ఎలిమినేటర్ మ్యాచ్లో సన్రైజర్స్పై కేవలం 29 బంతుల్లోనే 97 పరుగులు సాధించి అందరి ప్రశంసలు అందుకున్నాడు. ఇన్నింగ్స్తో వేగవంతమైన సెంచరీ సాధించే అవకాశానికి దగ్గరగా వెళ్లినా, అది కాస్త తృటిలో చేజారిపోయింది. అయితే వ్యక్తిగత రికార్డుల కంటే జట్టు విజయానికే ఎక్కువ ప్రాధాన్యం ఇస్తానని వైభవ్ స్పష్టం చేశాడు. ప్రత్యర్థులు ఎలాంటి వ్యూహాలతో వచ్చినా, తనకు తనదైన ప్రణాళికలు ఉంటాయని తెలిపాడు. ఈ మ్యాచ్లో ప్లేయర్ ఆఫ్ ది మ్యాచ్ అవార్డు అందుకున్న అతడి వద్ద ప్రస్తుతం ఆరెంజ్ క్యాప్ కూడా ఉంది. ఇప్పటివరకు ఈ సీజన్లో అతడు 680 పరుగులు నమోదు చేశాడు.
క్వాలిఫయర్-2లో కూడా ఇదే ఉత్సాహంతో ఆడతా..
జట్టు గెలిచినప్పుడు అందరిలోనూ ఆత్మవిశ్వాసం పెరుగుతుంది. ఆ ఉత్సాహంతోనే తదుపరి మ్యాచ్కు సిద్ధమవుతాం. తర్వాతి మ్యాచ్లో ఎలా ఆడాలి అనే విషయంపైనే మా దృష్టి ఉంటుంది. క్వాలిఫయర్-2లో కూడా ఇదే ఉత్సాహంతో ఆడి ఫైనల్కు చేరుకోవాలని లక్ష్యంగా పెట్టుకున్నాం. అయితే రాబోయే మ్యాచ్ గురించి ముందుగానే ఎక్కువగా ఆలోచించను. మైదానంలోకి దిగిన తర్వాత పరిస్థితులకు అనుగుణంగా నా ఆటను కొనసాగిస్తా. కానీ మ్యాచ్కు ముందు అవసరమైన సన్నద్ధతపై మాత్రం పూర్తి దృష్టి పెడతా. ప్రత్యర్థి బౌలర్లు ఎవరు? పిచ్ స్వభావం ఎలా ఉంది? బౌండరీల పరిమాణం ఎంత? వంటి అంశాలను పరిశీలిస్తా.
పాజిటివ్ మైండ్సెట్తో ఆడితే బౌలర్లపై ఒత్తిడి పెరుగుతుంది. మ్యాచ్లో ఆధిపత్యం చాటడమే నా ప్రధాన లక్ష్యం.
ఔటైన తర్వాతే ఆ రికార్డు గురించి తెలిసింది…
సెంచరీ చేజారిపోవడం కొంత నిరాశ కలిగించింది. అయితే అది వేగవంతమైన శతకంగా నమోదయ్యే అవకాశం ఉందని నాకు ఔటైన తర్వాతే తెలిసింది. నా కోచ్లు ఎప్పుడూ ఒత్తిడి లేకుండా స్వేచ్ఛగా బ్యాటింగ్ చేయమని ప్రోత్సహిస్తుంటారు. నేను ఔటైన బంతి కూడా సరైన టైమింగ్లో తగలలేదు.
ఫీల్డర్ స్థానం చూసిన తర్వాతే ఆ షాట్ ఆడాను. కానీ టైమింగ్ తప్పడంతో క్యాచ్గా మారింది. సెంచరీలు మళ్లీ మళ్లీ వస్తాయి. ట్రోఫీ గెలవడం మాత్రం అత్యంత ముఖ్యమైన విషయం. నా బ్యాటింగ్లో ఎక్కడైనా లోపం కనిపిస్తే వెంటనే దానిపై కష్టపడతా. ప్రత్యర్థులకు వాళ్ల వ్యూహాలు ఉంటే, నాకు కూడా నా ప్రణాళికలు ఉంటాయి. నా ఆటను కొనసాగించడానికే నేను ఎప్పుడూ ప్రయత్నిస్తా అని వైభవ్ చెప్పుకొచ్చాడు.
The post సెంచరీలు మళ్లీ వస్తాయి.. ట్రోఫీయే ముఖ్యం..: వైభవ్ appeared first on Visalaandhra.
