విశాఖలో కొత్త అద్భుతం.. కైలాసగిరిపై 65 అడుగుల భారీ త్రిశూలం..! Kailasagiri trident Visakhapatnam | విశాఖపట్నం వార్తలు (Visakhapatnam News)

సిటీలో ఎక్కడి నుంచైనా కనిపించేలా 65 అడుగుల ఎత్తుతో రూపొందించిన ఈ భారీ త్రిశూలం పర్యాటకుల చూపును కట్టిపడేస్తోంది. దీనికి అనుసంధానంగా 10 నుంచి 18 అడుగుల డమరుకాన్ని కూడా ఏర్పాటు చేశారు. కైలాసగిరి కొండపై తెలుగు సాంస్కృతిక నికేతన్ మ్యూజియం సమీపంలో నిర్మించిన ఈ ప్రాజెక్ట్‌ను విశాఖపట్నం మెట్రోపాలిటన్ రీజియన్ డెవలప్‌మెంట్ అథారిటీ (VMRDA) రూపకల్పన చేసి అభివృద్ధి చేసింది.

ఇప్పటికే రోప్‌వే, జిప్‌లైన్, గ్లాస్ బ్రిడ్జ్ వంటి ఆకర్షణలతో సందడిగా ఉండే కైలాసగిరి.. ఇప్పుడు ఈ త్రిశూలంతో మరింత ఆధ్యాత్మిక వాతావరణాన్ని సంతరించుకుంది. ముఖ్యంగా రాత్రివేళ వెలుగులు విరజిమ్మే ఈ భారీ త్రిశూలం సిటీ మొత్తాన్ని ఆకట్టుకుంటోంది. దూరం నుంచే కనిపించే ఈ ప్రకాశవంతమైన నిర్మాణం సోషల్ మీడియాలో కూడా వైరల్ అవుతోంది. సెల్ఫీలు, రీల్స్ కోసం యువత పెద్ద సంఖ్యలో ఇక్కడికి చేరుకుంటున్నారు.

త్రిశూలం వద్ద ప్రత్యేకంగా వ్యూ పాయింట్ కూడా ఏర్పాటు చేశారు. అక్కడి నుంచి చూస్తే విశాఖ నగరం, సముద్ర తీరం, కొండల అందాలు ఒకేసారి కనిపిస్తూ అద్భుత అనుభూతిని కలిగిస్తున్నాయి. సాయంత్రం సమయాల్లో ఇక్కడి వాతావరణం మరింత మంత్రముగ్ధులను చేస్తోంది.

విశాఖను టూరిజం హబ్‌గా తీర్చిదిద్దే దిశగా పర్యాటక ప్రాంతాలను అభివృద్ధి చేస్తున్నామని VMRDA చైర్మన్ ప్రణవ్ గోపాల్ తెలిపారు. విశాఖకు వచ్చే ప్రతి పర్యాటకుడికి ఈ త్రిశూలం మరో స్పెషల్ ఎట్రాక్షన్‌గా మారుతుందని చెప్పారు. ముఖ్యంగా ఈ ప్రదేశాన్ని సందర్శించేందుకు ఎలాంటి ప్రత్యేక ఫీజు లేదని, కైలాసగిరికి వచ్చే ప్రతి ఒక్కరూ ఉచితంగా వీక్షించవచ్చని తెలిపారు.

రాత్రివేళల్లో అద్భుతంగా కనిపించేలా ప్రత్యేక లైటింగ్‌తో దీనిని డిజైన్ చేశామని, విశాఖ నగరానికి ఇది కొత్త గుర్తింపుగా నిలుస్తుందని అధికారులు చెబుతున్నారు. ఇకపై కైలాసగిరికి వెళ్లే ప్రతి పర్యాటకుడు శివపార్వతులతో పాటు ఈ భారీ త్రిశూలం, డమరుకం వద్ద ఫొటోలు దిగకుండా తిరిగి రావడం కష్టమే అనిపిస్తోంది.