Heat Effect: 6 వేల విద్యార్థుల మెగా కోలాటం వాయిదా.. కొత్త తేదీ ఎప్పుడంటే..? |

గత కొన్ని రోజులుగా జిల్లాలో ఎండ తీవ్రత అసాధారణంగా పెరిగిందని, ఉదయం 9 గంటలకే బయట నిలబడటం కష్టమయ్యే స్థాయికి చేరిందని మంత్రి పేర్కొన్నారు. ఈ పరిస్థితుల్లో కార్యక్రమంలో పాల్గొనాల్సిన సుమారు 6 వేల మంది విద్యార్థుల ఆరోగ్యాన్ని ప్రమాదంలోకి నెట్టడం సరికాదని భావించి ఈ నిర్ణయం తీసుకున్నామని తెలిపారు. ఇప్పటికే విద్యార్థులు ఎంతో ఉత్సాహంతో సాధన చేసి సిద్ధంగా ఉన్నప్పటికీ, వారి భద్రతను ముందుంచుకోవాల్సిన బాధ్యత ప్రభుత్వంపై ఉందని ఆమె వివరించారు.

ఇటీవల నిర్వహించిన డ్రగ్స్ వద్దు బ్రో కార్యక్రమంలో కూడా ఎండల కారణంగా కొంతమంది విద్యార్థులు అస్వస్థతకు గురైన విషయాన్ని మంత్రి గుర్తు చేశారు. అలాంటి ఘటనలు మళ్లీ పునరావృతం కాకుండా ముందస్తు జాగ్రత్తగా ఈసారి మెగా కోలాటం వాయిదా వేయాల్సి వచ్చిందని తెలిపారు.

ఇక ఏప్రిల్ 24 నుంచి పాఠశాలలకు వేసవి సెలవులు ప్రారంభం కానున్న నేపథ్యంలో, విద్యార్థులు మరియు తల్లిదండ్రులు ఎండల పట్ల అప్రమత్తంగా ఉండాలని అధికారులు సూచిస్తున్నారు. ముఖ్యంగా మధ్యాహ్న వేళల్లో బయటకు వెళ్లకుండా ఉండటం, తగినంత నీరు తీసుకోవడం, ఆరోగ్యంపై శ్రద్ధ వహించడం అవసరమని హెచ్చరిస్తున్నారు.

వాయిదా పడిన ఈ భారీ కార్యక్రమాన్ని ఉష్ణోగ్రతలు తగ్గిన తర్వాత మళ్లీ నిర్వహించనున్నట్లు ప్రభుత్వం తెలిపింది. కొత్త తేదీని త్వరలో ప్రకటించనున్నట్లు స్పష్టం చేసింది. జిల్లాలో విద్యార్థులు, ఉపాధ్యాయులు పెద్ద ఎత్తున చేసిన సన్నాహాలు కారణంగా ఈ నిర్ణయం కొంత నిరాశ కలిగించినప్పటికీ, పిల్లల ఆరోగ్య రక్షణ కోసమే తీసుకున్న బాధ్యతాయుత నిర్ణయంగా అధికారులు పేర్కొంటున్నారు.