Murder: హరియాణాలో దారుణం.. గుడివాడ సాఫ్ట్‌వేర్ ఇంజనీర్ దారుణ హత్య.. ఉద్యోగంలో చేరిన 10 రోజులకే మృతి | ఆంధ్రప్రదేశ్ వార్తలు

కొత్త ఉద్యోగంలో చేరిన ఆనందంలో ఉన్న కుటుంబ సభ్యులకు గురువారం రాత్రి గుడివాడ వన్‌టౌన్ పోలీసులు ఒక చేదు వార్తను మోసుకొచ్చారు. హరియాణా పోలీసులు పంపిన ఒక ఫోటోను రుషీకేశ్ తల్లిదండ్రులకు చూపించి, గుర్తుపట్టమని కోరారు. రక్తపు మడుగులో విగతజీవిగా పడి ఉన్న తన కుమారుడి ఫోటోను చూడగానే తల్లి లక్ష్మి, తండ్రి మోహనరావు ఒక్కసారిగా కుప్పకూలిపోయారు. తాము నివాసం ఉంటున్న గదిలోనే ఎవరో గుర్తుతెలియని వ్యక్తులు రుషీకేశ్‌ను దారుణంగా హత్య చేసినట్లు హరియాణా పోలీసులు ప్రాథమిక సమాచారం అందించారు.

రుషీకేశ్ చాలా మృదుస్వభావి అని, ఎవరితోనూ గొడవలకు వెళ్లే వ్యక్తి కాదని స్థానికులు చెబుతున్నారు. “నా కొడుకు చీమకు కూడా హాని చేయని మనస్తత్వం కలవాడు.. అంతటి వాడిని ఇంత దారుణంగా ఎందుకు చంపేశారు?” అంటూ తల్లి లక్ష్మి రోదిస్తున్న తీరు అక్కడి వారిని కంటతడి పెట్టించింది. చేతికంది వచ్చిన కొడుకు ఉన్నత స్థితిలో ఉంటాడని ఆశించిన ఆ తల్లిదండ్రులకు ఇప్పుడు పుత్రశోకం మిగిలింది.

హరియాణాలోని పంచకుల పోలీసులు ఈ హత్యపై కేసు నమోదు చేసి దర్యాప్తు చేస్తున్నారు. రుషీకేశ్ నివసించిన గదిలో ఎటువంటి ఆధారాలు దొరికాయి? హత్యకు గల కారణాలు ఏమిటి? వ్యక్తిగత కక్షలా లేదా మరేదైనా కారణమా అనే కోణంలో విచారణ సాగుతోంది. గురువారం రాత్రి సమాచారం అందుకున్న కుటుంబ సభ్యులు, శనివారం ఉదయం విమానంలో హరియాణాకు బయలుదేరి వెళ్లారు. అక్కడ పోస్టుమార్టం అనంతరం మృతదేహాన్ని గుడివాడకు తీసుకువచ్చే ఏర్పాట్లు చేస్తున్నారు.