Weather Update: ఉదయం ఎండ, రాత్రికి చలి.. మార్చిలో వాతావరణం ఎలా ఉంటుందంటే..? | విశాఖపట్నం వార్తలు (Visakhapatnam News)

విశాఖలో పరిస్థితి చూస్తే.. ఉదయం ఏడు, ఎనిమిది గంటలవరకూ చలి వీడటం లేదు. అర్థరాత్రి దాదాపు 20 డిగ్రీలకు లోపే కనిష్ట ఉష్ణోగ్రతలు నమోదవుతున్నాయి. మధ్యాహ్నం మాత్రం ముప్పై డిగ్రీల వరకూ ఉష్ణోగ్రత నమోదువుతోంది. అంటే ఉదయం నాలుగు గంటలు మాత్రమే వేడి ఉంటోంది. మిగతా అంతా శీతల గాలులు, చలి తీవ్రత ఉంటోంది. దీనిపై విశాఖ తుఫాను హెచ్చరికల కేంద్రం, విశాఖ వాతావరణ సమాచార కేంద్రం అధికారులు “న్యూస్ 18″తో మాట్లాడారు. ఇది ట్రాన్షిషన్ పిరియడ్ అంటారని.. ఇలాంటి సందర్భంలో చలి, వేడి ఒకేసారి ప్రభావం చూపిస్తాయంటున్నారు.

ఈ ఏడాది మార్చి నుంచీ వేడి గాలులు మొదలవుతాయని.. అప్పటి దాకా వాతావరణం ఇలాగే ఉంటుందని వివరించారు. నైరుతీ, ఈశాన్య రుతుపవనాలు పూర్తిగా నిష్క్రమించాయని.. అలాగే ఆకాశం కూడా క్లియర్ గా ఉండటంతో ఈ రకమైన వేడిమి ఉంటుందని వివరించారు. మార్చి రెండో వారానికి ఎండలు ఎక్కువ అవుతాయని.. మే నెలలో అత్యధిక ఉష్ణోగ్రతలు నమోదవుతాయని అంచనా. ఈ ఏడాది వేసవి ప్రభావం ఎక్కువే ఉంటుందని అధికారులు సూచించారు. అలాగే ప్రజలు జాగ్రత్తగా ఉండాలని కూడా సూచనలు చేశారు. ఈ ఏడాదిలో ఇప్పటికి మూడు నెలలు చలి తీవ్రత కొనసాగిందని వివరించారు. ఇక ఫిబ్రవరి ఎండింగ్ లో చలి తీవ్రత పూర్తిగా తగ్గిపోతుందని.. అప్పటి నుంచీ ఎండలు దంచికొడతాయన్నది వాతావరణ శాఖ వివరణ.