Last Updated:
స్టేషన్లో ప్లాట్ఫారాలు ఖాళీ లేక గంటల తరబడి నగరం బయటే ఆగిపోవాల్సి వస్తోంది. ఈ సమస్యను అధిగమించేందుకు దక్షిణ మధ్య రైల్వే రాయనపాడు, గుణదల స్టేషన్లను అత్యాధునిక ‘శాటిలైట్ స్టేషన్లు’గా తీర్చిదిద్దింది.
Vijayawada: దేశంలోనే అత్యంత రద్దీగా ఉండే రైల్వే జంక్షన్లలో ఒకటైన విజయవాడలో ప్రయాణికుల ప్రధాన సమస్య అయిన ‘ఔటర్ నిరీక్షణ’కు త్వరలోనే తెరపడనుంది. సికింద్రాబాద్ నుండి వచ్చే ఫలక్నుమా ఎక్స్ప్రెస్ అయినా, విశాఖపట్నం నుండి వచ్చే చెన్నై ఎక్స్ప్రెస్ అయినా.. స్టేషన్లో ప్లాట్ఫారాలు ఖాళీ లేక గంటల తరబడి నగరం బయటే ఆగిపోవాల్సి వస్తోంది. ఈ సమస్యను అధిగమించేందుకు దక్షిణ మధ్య రైల్వే రాయనపాడు, గుణదల స్టేషన్లను అత్యాధునిక ‘శాటిలైట్ స్టేషన్లు’గా తీర్చిదిద్దింది.
ఈనాడు కథనం ప్రకారం.. సుమారు రూ. 300 కోట్ల వ్యయంతో ‘అమృత్ భారత్ స్టేషన్’ పథకం కింద ఈ శాటిలైట్ స్టేషన్లను అభివృద్ధి చేస్తున్నారు.
రాయనపాడు స్టేషన్: ఇప్పటికే రూ. 19.90 కోట్లతో మొదటి దశ పనులు పూర్తి చేసుకున్న రాయనపాడు స్టేషన్ ప్రారంభానికి సిద్ధంగా ఉంది. ఇక్కడ వెయిటింగ్ హాళ్లు, అత్యాధునిక బుకింగ్ కౌంటర్లు, దివ్యాంగుల కోసం ప్రత్యేక సౌకర్యాలు మరియు విశాలమైన పార్కింగ్ ఏరియాను ఏర్పాటు చేశారు.
గుణదల స్టేషన్: సుమారు రూ. 35.5 కోట్లతో గుణదలను మరో శాటిలైట్ హబ్గా మారుస్తున్నారు. ఇక్కడ 100 అడుగుల అనుసంధాన రోడ్డు పనులు కూడా వేగంగా జరుగుతున్నాయి.
విజయవాడ ప్రధాన స్టేషన్కు రాకుండానే రైళ్లను మళ్లించడం ద్వారా రద్దీని తగ్గించాలని అధికారులు ప్లాన్ చేస్తున్నారు:
హైదరాబాద్ రూట్: సికింద్రాబాద్ వైపు నుంచి వచ్చే రైళ్లు రాయనపాడులో ఆగి, అక్కడి నుంచే కొండపల్లి మీదుగా తిరిగి వెళ్లేలా ఏర్పాట్లు చేస్తున్నారు.
విశాఖ రూట్: విశాఖపట్నం నుండి వచ్చే రైళ్లను గుణదల స్టేషన్ వద్ద నిలిపివేసి, అక్కడి నుంచే నేరుగా సికింద్రాబాద్ వైపు మళ్లిస్తారు.
పుష్కరాల నాటికి పూర్తిస్థాయిలో: 2026లో జరగనున్న కృష్ణా పుష్కరాల నాటికి ఈ రెండు స్టేషన్లను పూర్తిస్థాయి టెర్మినల్స్గా అందుబాటులోకి తీసుకురావాలని రైల్వే శాఖ లక్ష్యంగా పెట్టుకుంది.
రాయనపాడు, గుణదల స్టేషన్ల నుండి విజయవాడ నగరానికి చేరుకోవడానికి వీలుగా ఆర్టీసీ బస్సులను, ఆటో సేవలను పెంచాలని ప్రభుత్వం నిర్ణయించింది. ఎంపీ కేశినేని శివనాథ్ (చిన్ని), ఎమ్మెల్యే బోండా ఉమామహేశ్వరరావు గొల్లపూడి మరియు సింగ్నగర్ ప్రాంతాల్లో కూడా శాటిలైట్ స్టేషన్లు ఏర్పాటు చేయాలని రైల్వే బోర్డుకు ప్రతిపాదనలు పంపారు. ఇవి కూడా అందుబాటులోకి వస్తే నున్న, అగిరిపల్లి, నందిగామ ప్రాంతాల వారికి విజయవాడ మెయిన్ స్టేషన్కు రావాల్సిన అవసరం ఉండదు. రైల్వే స్టేషన్ పునర్నిర్మాణ పనుల కారణంగా ప్రస్తుతం 10 ప్లాట్ఫారాలపై ఒత్తిడి పెరుగుతున్న తరుణంలో, ఈ శాటిలైట్ స్టేషన్లు ప్రయాణికులకు పెద్ద ఊరటనివ్వనున్నాయి.
Click here to add News18 as your preferred news source on Google. ఆంధ్రప్రదేశ్లోని ముఖ్యమైన వార్తలు, లేటెస్ట్ న్యూస్, స్థానిక వార్తలు, ప్రభుత్వ పథకాలు, ప్రభుత్వ ప్రకటనలు, అన్ని రాజకీయ పార్టీలకు సంబంధించిన స్టోరీలను న్యూస్18 తెలుగు ఆంధ్రప్రదేశ్ కేటగిరీలో చదవండి. మరిన్ని వార్తల కోసం న్యూస్ 18 తెలుగు ఫాలో అవండి.
Hyderabad,Telangana
