Vijayawada: విజయవాడలో అమానుషం.. మతిస్థిమితం లేని ఇద్దరు బాలికలపై యువకుడి ఘాతుకం.. తినుబండారాల ఆశ చూపి.. | ఆంధ్రప్రదేశ్ వార్తలు

పోలీసుల విచారణలో వెల్లడైన వివరాల ప్రకారం.. విజయవాడలోని రామలింగేశ్వరనగర్ ప్రాంతంలో ఒక మతిస్థిమితం లేని 15 ఏళ్ల బాలిక తన అమ్మమ్మ వద్ద ఉంటోంది. ఆ ఇంటి సమీపంలోనే నివసిస్తున్న మరో బాలికకు కూడా మానసిక స్థితి సరిగ్గా లేదు. ఈ ఇద్దరు బాలికలు స్నేహంగా ఉంటూ కలిసి తిరుగుతుండేవారు. వీరి పరిస్థితిని గమనించిన అదే ప్రాంతానికి చెందిన నడికుడిటి వెంకట శ్రీనాథ్ (19) అనే యువకుడు వారిపై కన్నేశాడు. శ్రీనాథ్ నగరంలోని ఒక కళాశాలలో హోటల్ మేనేజ్‌మెంట్ కోర్సు చదువుతున్నాడు.

నిందితుడు శ్రీనాథ్ ఆ బాలికలకు చాక్లెట్లు, ఇతర తినుబండారాలు మరియు చిన్న చిన్న వస్తువులు ఆశ చూపి తన ద్విచక్ర వాహనంపై ఎక్కించుకునేవాడు. కృష్ణా నది సమీపంలోని నిర్మానుష్యంగా ఉన్న ఒక పాడుబడిన భవనంలోకి వారిని తీసుకువెళ్లి, అక్కడ పలుమార్లు వారిపై అత్యాచారానికి పాల్పడ్డాడు. బాలికలు తమపై జరుగుతున్న అన్యాయాన్ని ఎవరికీ చెప్పుకోలేని స్థితిలో ఉండటాన్ని అతను తనకు అనుకూలంగా మార్చుకున్నాడు.

ఈ నెల 15వ తేదీన ఒక బాలిక తీవ్రంగా నీరసించి ఉండటాన్ని ఆమె అమ్మమ్మ గమనించింది. అనుమానం వచ్చి, వేరే ఊరిలో ఉంటున్న బాలిక తల్లికి సమాచారం అందించింది. దీంతో తల్లి 16వ తేదీన విజయవాడకు చేరుకుని తన కుమార్తెను నిలదీసింది. ఆ సమయంలో బాలిక భయం భయంగానే.. శ్రీనాథ్ అనే యువకుడు తనతో పాటు తన స్నేహితురాలిని కూడా ఒక చోటకి తీసుకువెళ్లి ఇబ్బంది పెడుతున్నాడని వివరించింది.

ఫిర్యాదు స్వీకరించిన పటమట పోలీసులు తక్షణమే స్పందించారు. బాలికలను వైద్య పరీక్షల నిమిత్తం ప్రభుత్వ ఆసుపత్రికి తరలించారు. పరీక్షలు చేసిన వైద్యులు ఆ ఇద్దరు బాలికలపై అత్యాచారం జరిగినట్లు నిర్ధారించారు. గతంలో కూడా పలుమార్లు వారిపై లైంగిక దాడి జరిగినట్లు విచారణలో తేలింది. దీంతో పోలీసులు నిందితుడు వెంకట శ్రీనాథ్‌పై పోక్సో (POCSO) చట్టం కింద మరియు అత్యాచార సెక్షన్ల కింద కేసులు నమోదు చేసి, అతడిని అదుపులోకి తీసుకున్నారు.