Tragedy: అల్లూరి జిల్లాలో వరుస విషాదాలు.. నీటిలో మునిగి ముగ్గురు బాలురు మృతి..! series-of-water-accidents-in-alluri-district-death-of-children. |

మృతులను కోడా ప్రదీప్ (9), పాంగి శ్రీను (10), జల్లుంగి అర్షిత్ (10)గా గుర్తించారు. ఈ ఘటనలో మరో బాలుడిని స్థానికులు అప్రమత్తంగా వ్యవహరించి కాపాడగలిగారు. చిన్నారులు ఆటపాటలతో గడుపుతూ చేపల వేటకు వెళ్లిన సమయంలో ఈ ప్రమాదం చోటుచేసుకున్నట్లు తెలుస్తోంది. సమాచారం అందుకున్న పోలీసులు వెంటనే సంఘటనా స్థలానికి చేరుకుని కేసు నమోదు చేసి దర్యాప్తు ప్రారంభించారు.

ఘటన తరువాత గ్రామంలో విషాద వాతావరణం నెలకొంది. చిన్నారుల మృతదేహాలను పోస్టుమార్టం నిమిత్తం తరలించగా, కుటుంబ సభ్యుల రోదనలు అక్కడి వారిని కలచివేశాయి. ఒకే ప్రాంతానికి చెందిన ముగ్గురు పిల్లలు ఇలా ప్రాణాలు కోల్పోవడం అందరినీ తీవ్రంగా కలచివేస్తోంది.

ఇదే జిల్లాలో తాజాగా జరిగిన విషాదకర ఘటనను ప్రజలు ఇంకా మర్చిపోకముందే మరో ఘటన చోటుచేసుకుంది. అల్లూరి సీతారామరాజు జిల్లాలోని మూలగుమ్మి జలపాతంలో సెల్ఫీ దిగేందుకు వెళ్లిన నలుగురు బాలికల్లో ముగ్గురు జారి పడిపోవడంతో మృతి చెందారు. ఈ ఘటనలో అంజలి అనే బాలిక తీవ్రంగా గాయపడి ప్రస్తుతం ఆసుపత్రిలో చికిత్స పొందుతోంది. ఈ సంఘటన జిల్లాలో పెద్ద ఎత్తున చర్చనీయాంశమైంది.

ఈ ఘటన జరిగి ఒక రోజు గడవక ముందే.. మరోసారి చిన్నారులు నీటిలో మునిగి ప్రాణాలు కోల్పోవడం ప్రజల్లో ఆందోళనను పెంచుతోంది. వరుసగా జరుగుతున్న ఈ ప్రమాదాలు తల్లిదండ్రుల్లో భయం కలిగిస్తున్నాయి. పిల్లలు ఎక్కడికి వెళ్తున్నారు, ఎవరితో వెళ్తున్నారు అన్న విషయాల్లో మరింత జాగ్రత్తగా ఉండాల్సిన అవసరం ఉందని అధికారులు సూచిస్తున్నారు. ముఖ్యంగా పిల్లలకు సెలవుల సమయంలో చెరువులు, వాగులు, జలపాతాల వద్దకు అస్సలు వెళ్లకూడదని హెచ్చరిస్తున్నారు. పిల్లలను ఇలాంటి ప్రాంతాలకు ఒంటరిగా వెళ్లనివ్వకుండా కచ్చితమైన నియంత్రణ అవసరమని చెబుతున్నారు. చిన్న నిర్లక్ష్యం ఎంత పెద్ద విషాదానికి దారితీస్తుందో ఈ రెండు ఘటనలు స్పష్టంగా తెలియజేస్తున్నాయి.