Tirumala Vasantotsavam: తిరుమలలో వసంత శోభ.. నేటి నుండి మూడు రోజుల పాటు శ్రీవారి వసంతోత్సవాలు! |

వసంతోత్సవాల ప్రారంభానికి ముందు అంకురార్పణ కార్యక్రమాన్ని అర్చకులు శాస్త్రోక్తంగా నిర్వహిస్తారు. పుణ్యాహవచనం, ప్రకృతి దేవతలకు శాంతి పూజలు, సంప్రోక్షణాది క్రతువులు నిర్వహించి ఉత్సవాలు నిర్విఘ్నంగా జరగాలని ప్రార్థిస్తారు. అనంతరం నవధాన్యాలతో అంకురార్పణ నిర్వహించడం ప్రత్యేకత. మొదటి రోజు ఉత్సవమూర్తులైన శ్రీదేవి, భూదేవి సమేత మలయప్ప స్వామి వారు మేళ తాళాల నడుమ వసంత మండపానికి వేంచేపు చేస్తారు. అక్కడ ఆస్థానం, సడళ్లింపు సేవలు, మధ్యాహ్నం స్నపన తిరుమంజనం, అభిషేకాలు ఘనంగా నిర్వహిస్తారు. ఈ కార్యక్రమాల అనంతరం స్వామివారు ఆలయంలోకి తిరిగి ప్రవేశించి భాష్యకారుల మండపంలో ఆస్థానం అందుకుంటారు.

రెండవ రోజు ఉదయం స్వామివారు సువర్ణ రథంపై తిరుమాడ వీధుల్లో భక్తులకు దర్శనమిస్తారు. మధ్యాహ్నం వసంత మండపంలో స్నపన తిరుమంజనం నిర్వహించి, సాయంత్రం తిరిగి ఆలయానికి చేరుకుని ఆస్థానం జరుగుతుంది. మూడవ రోజు వసంతోత్సవాలు మరింత వైభవంగా కొనసాగుతాయి. మలయప్ప స్వామివారితో పాటు రుక్మిణీ సమేత శ్రీకృష్ణస్వామి, సీతారామలక్ష్మణులు వేర్వేరు పల్లకీలలో వసంత మండపానికి వేంచేపు చేయబడతారు. అనంతరం అభిషేకాలు నిర్వహించి తిరిగి ఆలయ ప్రవేశం జరుగుతుంది. ఈ ఉత్సవాల్లో సుగంధ పుష్పాలు, ఫలాలు సమర్పించడం ప్రధానంగా జరుగుతుంది.ప్రతి రోజు మధ్యాహ్నం 2 నుంచి 4 గంటల వరకు స్నపన తిరుమంజనం, సాయంత్రం ఆస్థానం నిర్వహించబడుతుంది.

వసంతోత్సవాల సందర్భంగా భక్తుల సౌకర్యార్థం టీటీడీ కొన్ని ఆర్జిత సేవలను రద్దు చేసింది. మార్చి 30 నుంచి ఏప్రిల్ 1 వరకు కల్యాణోత్సవం, ఉంజల్ సేవ, ఆర్జిత బ్రహ్మోత్సవం, సహస్రదీపాలంకార సేవలను నిలిపివేసింది. అదేవిధంగా మార్చి 31న అష్టదళ పాదపద్మారాధన సేవను కూడా రద్దు చేశారు. ఈ మార్పుల నేపథ్యంలో భక్తులు తమ దర్శన ప్రణాళికలను సక్రమంగా రూపొందించుకోవాలని టీటీడీ సూచించింది. మొత్తం మీద వసంతోత్సవాలు తిరుమలలో ఆధ్యాత్మిక ఉత్సాహాన్ని మరింత పెంచుతూ భక్తులకు అరుదైన దర్శనానుభూతిని అందించనున్నాయి.