Tirumala: శ్రీవారి అభిషేక సేవలో కల్వకుంట్ల కవిత .. వెంకన్నకు మొక్కులు తీర్చుకున్న నాయకురాలు |

మాజీ ఎమ్మెల్సీ కల్వకుంట్ల కవిత తిరుమల శ్రీవారిని దర్శించుకున్నారు. గురువారం సాయంత్రం అలిపిరి మెట్ల మార్గంలో నడుచుకుంటూ తిరుమలకు చేరుకున్నారు. శుక్రవారం ఉదయం కుటుంబ సభ్యులతో కలిసి స్వామివారి అభిషేక సేవలో పాల్గొన్నారు. దర్శనానంతరం ఆలయ రంగనాయకుల మండపంలో వేదపండితులు ఆమెకు వేదాశీర్వచనం అందించగా, ఆలయ అధికారులు శ్రీవారి తీర్థప్రసాదాలు అందజేసి పట్టువస్త్రంతో ఘనంగా సత్కరించారు.

ఈ సందర్భంగా ఆలయ పరిసరాల్లో భక్తులు ఆమెకు స్వాగతం పలికారు. అనంతరం ఆలయం వెలుపల మీడియాతో మాట్లాడిన కవిత గత నాలుగు సంవత్సరాలుగా తాను తీవ్ర మనోవేదనను ఎదుర్కొన్నానని పేర్కొన్నారు. అయితే స్వామివారి కృపతో కోర్టు తనకు క్లీన్ చిట్ ఇచ్చిందని తెలిపారు. కోర్టు కేసులు కొట్టివేయబడిన నేపథ్యంలో మొక్కు తీర్చుకోవడానికి అలిపిరి నుంచి కాలినడకన తిరుమలకు చేరుకుని స్వామివారిని దర్శించుకున్నానని చెప్పారు.

అలాగే రాబోయే రోజుల్లో తెలంగాణలో ప్రజలకు దగ్గరగా పనిచేసే ఒక రాజకీయ పార్టీని స్థాపించాలనే ఆలోచనలో ఉన్నట్టు వెల్లడించారు. ఆ పార్టీకి శ్రీవారి ఆశీస్సులు ఉండాలని ప్రార్థించినట్టు తెలిపారు. రెండు తెలుగు రాష్ట్రాల ప్రజలు ఎల్లప్పుడూ సుఖసంతోషాలతో ఉండాలని, సమాజంలో శాంతి, సౌభ్రాతృత్వం నెలకొనాలని ఆకాంక్షించారు.