Tiger Attack: మూడు ఆవు దూడల రక్తం తాగి మత్తుగా నిద్రపోతున్న పెద్దపులి.. డ్రోన్ కెమెరాకు చిక్కిన దృశ్యాలు! | ఈస్ట్ గోదావరి వార్తలు (East Godavari News)

మన్యం ప్రాంతంలో పెద్దపులి సంచారం ఇప్పుడు పెను సంచలనంగా మారింది. పర్యాటక ప్రాంతమైన దేవీపట్నం మండలంలోని కొత్తవీధి పరిసరాల్లో పెద్దపులి జరిపిన దాడి పశువుల కాపరులను, గ్రామస్థులను దిగ్భ్రాంతికి గురిచేసింది. సాధారణంగా పులి ఏదైనా ఒక జంతువుపై దాడి చేసి, దానిని ఆహారంగా తీసుకున్న తర్వాత కొన్ని రోజుల పాటు శాంతిస్తుంది. కానీ, కొత్తవీధి సమీపంలో ఈ పులి ప్రవర్తన భిన్నంగా ఉంది. ఏకంగా మూడు ఆవు దూడలపై ఒకేసారి దాడి చేసి, వాటి రక్తాన్ని తాగి హతమార్చడం ఈ పులి ఎంత క్రూరంగా మారిందో అర్థం చేస్తోంది.

పశువులపై దాడి చేసిన అనంతరం పులి సమీపంలోని దట్టమైన అటవీ ప్రాంతంలోకి వెళ్లి సేద తీరుతున్నట్లు అటవీశాఖ అధికారులు గుర్తించారు. అత్యాధునిక డ్రోన్ కెమెరాల సాయంతో గాలింపు చేపట్టగా, అటవీ సమీపంలోని ఒక చల్లని ప్రదేశంలో పులి నిద్రిస్తున్న దృశ్యాలు రికార్డయ్యాయి. పులి ఒకే చోట స్థిరంగా ఉండటంతో, ఇదే సరైన సమయమని భావించిన అధికారులు దానిని బంధించేందుకు వ్యూహరచన చేశారు.

పులిని బంధించేందుకు విశాఖపట్నం ఇతర ప్రాంతాల నుంచి ప్రత్యేక నిపుణుల బృందాలు రంపచోడవరం చేరుకున్నాయి. మత్తు ఇంజక్షన్ గన్నులతో (Tranquilizer Guns) సిద్ధమైన ఈ టీంలు పులి నిద్రిస్తున్న ప్రాంతాన్ని చుట్టుముట్టాయి. అడవిలో పులి కదలికలను నిశితంగా గమనిస్తూ, అత్యంత జాగ్రత్తగా ఆపరేషన్ నిర్వహిస్తున్నారు. పులిని బంధించి సురక్షిత ప్రాంతానికి తరలించకపోతే, పశువులే కాకుండా మనుషులపై దాడులు జరిగే ప్రమాదం ఉందని అటవీశాఖ ఉన్నతాధికారులు ఆందోళన వ్యక్తం చేస్తున్నారు.

ప్రస్తుతం దేవీపట్నం మండలంలోని కొండలపై ఉన్న అతి పురాతన రామాలయాల్లో శ్రీరామనవమి అనుబంధ ఉత్సవాలు జరుగుతున్నాయి. అయితే పులి సంచారం సరిగ్గా అదే ప్రాంతంలో ఉండటంతో అటవీశాఖ అధికారులు కఠిన నిర్ణయం తీసుకున్నారు. కొండపై ఉన్న రాములోరి ఆలయం వద్ద ఉన్న భక్తులందరూ వెంటనే కిందకు వచ్చేయాలని అధికారులు పిలుపునిచ్చారు.

నేటి రాత్రి కొండలపై ఎటువంటి కార్యక్రమాలు నిర్వహించకూడదని, ప్రజలు అటవీ ప్రాంతానికి దూరంగా ఉండాలని విజ్ఞప్తి చేశారు. పులి ఎటువైపు నుంచి దాడి చేస్తుందో ఊహించలేమని, ప్రజల ప్రాణరక్షణే తమకు ముఖ్యమని అధికారులు స్పష్టం చేశారు.