Srisailam Teppotsavam: శ్రీశైలంలో కన్నులపండువగా తెప్పోత్సవం.. పుష్కరిణిలో విహరించిన ఆదిదంపతులు! |

తెప్పోత్సవానికి ముందుగా ఆలయ ప్రాంగణంలో విశేష పూజలు జరిగాయి. ఉత్సవ మూర్తులకు అర్చకులు, వేద పండితులు శాస్త్రోక్తంగా షోడశోపచార పూజలు నిర్వహించారు. అనంతరం స్వామి అమ్మవార్లను రాజగోపురం నుంచి సుందరంగా అలంకరించిన పల్లకిలో ఉంచి, మంగళవాయిద్యాల నడుమ ఊరేగింపుగా పుష్కరిణి వద్దకు తీసుకువచ్చారు. అక్కడ ప్రత్యేకంగా సిద్ధం చేసిన తెప్పపై ఉత్సవ మూర్తులను ఆశీనులను చేసి, వేదమంత్రోచ్ఛారణల మధ్య నీటిపై విహరింపజేశారు. ఈ ఘట్టాన్ని చూస్తున్న భక్తులు భక్తిపారవశ్యంలో మునిగితేలారు.

ఈ ఏడాది తెప్పోత్సవం కోసం దేవస్థానం అధికారులు అత్యంత కళాత్మకమైన ఏర్పాట్లు చేశారు. తెప్పను ఎరుపు, పసుపు బంతి పూలు, చామంతి, ఆస్టర్, జాబ్రా వంటి వివిధ రకాల సుగంధ పుష్పాలతో సర్వాంగ సుందరంగా తీర్చిదిద్దారు. చీకటి పడగానే రంగురంగుల విద్యుత్ దీపాల వెలుగులు నీటిపై ప్రతిబింబిస్తూ, అచ్చం కైలాసమే నేలకు దిగివచ్చిందా అన్నట్లుగా భ్రమింపజేశాయి. ఈ అద్భుత దృశ్యాన్ని తమ కెమెరాల్లో బంధించేందుకు భక్తులు పోటీ పడ్డారు.

శ్రీశైల క్షేత్రంలో తెప్పోత్సవానికి ఒక ప్రత్యేక విశిష్టత ఉంది. ఈ ఉత్సవాన్ని దర్శించుకోవడం వల్ల సకాలంలో వర్షాలు కురిసి, పాడిపంటలు సమృద్ధిగా పండుతాయని భక్తుల ప్రగాఢ విశ్వాసం. లోక కల్యాణం కోసం, భక్తుల కష్టాలను తీర్చడం కోసం పరమేశ్వరుడు అమ్మవారితో కలిసి ఇలా జలవిహారం చేస్తారని పురాణాలు చెబుతున్నాయి. “హర హర మహాదేవ.. శంభో శంకర” నినాదాలతో పుష్కరిణి మెట్ల వద్ద భక్తులు నీరాజనాలు పలికారు.

ఈ వేడుక ఏకాంతంగా కాకుండా భక్తుల సమక్షంలో వైభవంగా జరిగేలా నంద్యాల జిల్లా కలెక్టర్ రాజకుమారి, శ్రీశైల దేవస్థానం చైర్మన్ రమేష్ నాయుడు, ఈఓ శ్రీనివాసరావు ప్రత్యేక శ్రద్ధ తీసుకున్నారు. వేలాదిగా తరలివచ్చిన భక్తులకు ఎటువంటి ఇబ్బందులు కలగకుండా క్యూలైన్లు, భద్రత పరంగా కట్టుదిట్టమైన చర్యలు చేపట్టారు. ట్రస్ట్ బోర్డు సభ్యులు, ఆలయ అధికారులు సమన్వయంతో ఉత్సవాన్ని దిగ్విజయం చేశారు.