Sri Rama Navami: ఉత్తరాధి భద్రాద్రిలో ఘనంగా రాములోరి పెళ్లి.. రామతీర్థంలో శ్రీరామనవమి ఉత్సవాలు |

అనంతరం బాలభోగం, తీర్థగోష్టి, అవతార మహోత్సవం, అష్టకలశ అభిషేకం వంటి పూజలు భక్తిశ్రద్ధలతో కొనసాగాయి. వేద మంత్రోచ్చారణల మధ్య ఆలయ ప్రాంగణం ఆధ్యాత్మిక వాతావరణంతో మార్మోగింది. ఉదయం 10:30 గంటలకు శ్రీ సీతారాముల కల్యాణ మహోత్సవం ప్రారంభమైంది. అభిజిత్ లగ్నంలో జీలకర్ర-బెల్లం, మాంగల్యధారణ, తలంబ్రాలు వంటి ఘట్టాలు సంప్రదాయబద్ధంగా, వైభవంగా నిర్వహించబడ్డాయి. ఈ సందర్భంగా భక్తులు “జై శ్రీరామ్” నినాదాలతో ఆలయాన్ని మార్మోగించారు. స్వామివారి కల్యాణాన్ని కళ్లారా వీక్షించేందుకు పెద్ద సంఖ్యలో భక్తులు ఆసక్తిగా పాల్గొన్నారు.

ఈ మహోత్సవానికి జిల్లాలోని పలువురు ప్రముఖ రాజకీయ నాయకులు, ప్రజాప్రతినిధులు హాజరై స్వామివారి దర్శనం చేసుకుని ప్రత్యేక పూజల్లో పాల్గొన్నారు. ఆలయ నిర్వహణ కమిటీ ఆధ్వర్యంలో భక్తులకు ఎటువంటి అసౌకర్యాలు కలగకుండా సమగ్ర ఏర్పాట్లు చేశారు. తాగునీరు, క్యూలైన్లు, పార్కింగ్ వంటి సౌకర్యాలు అందుబాటులో ఉంచారు. భక్తుల రద్దీని దృష్టిలో ఉంచుకుని పోలీసు శాఖ విస్తృత బందోబస్తు ఏర్పాటు చేసింది. ట్రాఫిక్ నియంత్రణ చర్యలు చేపట్టి, ఎక్కడా అవాంఛనీయ ఘటనలు చోటుచేసుకోకుండా జాగ్రత్తలు తీసుకున్నారు. అలాగే వైద్య శాఖ ఆధ్వర్యంలో ప్రత్యేక వైద్య శిబిరాలు ఏర్పాటు చేసి, అత్యవసర సేవలను అందుబాటులో ఉంచారు.

అదేవిధంగా ఆలయ ప్రాంగణంలో భారీ అన్న సమారాధన కార్యక్రమం నిర్వహించారు. వేలాదిమంది భక్తులకు ప్రసాదం, అన్నదానం నిర్వహించి, సేవా కార్యక్రమాలను ఘనంగా నిర్వహించారు. భక్తులు భక్తిశ్రద్ధలతో స్వామివారిని దర్శించుకుని తమ మొక్కులు తీర్చుకున్నారు.ఉత్తరాది భద్రాద్రిగా ఖ్యాతి గాంచిన ఈ దేవస్థానంలో జరిగిన శ్రీరామనవమి వేడుకలు భక్తి, సంప్రదాయం, వైభవం సమ్మిళితంగా అద్భుతంగా నిలిచాయి.