New National Highway: ప్రయాణికులకు గుడ్ న్యూస్.. చిత్తూరు మీదుగా తచ్చుర్ హై వే రెడీ | చిత్తూరు వార్తలు (Chittoor News)

నిత్యం డేంజర్ రోడ్డుగా భావించే ఈ మార్గంలో ప్రమాదాలు జరిగే ప్రాంతాలకు దూరంగా మ్యాపింగ్ చేసి కర్ణాటకలోని హోసకోట నుండి ప్రారంభమై చిత్తూరు మీదుగా తచ్చుర్ హై వే  తమిళనాడులోకి కలవనున్నది. ఈ జాతీయ రహదారి పనులు కళ్లు చెదిరే విధంగా డిజైన్ చేశారు. హై వే వేయడానికి వీలు లేని ప్రదేశంలో వంతెనలు ఏర్పాటు చేశారు. వీటి డిజైన్ కూడా చాలా అద్భుతంగా ఉన్నాయి. ఇక చుట్టు పక్కల అటవీ ప్రాంతం నుండి రహదారిపైకి వచ్చే జంతువుల ప్రాణాల్ని దృష్టిలో పెట్టుకొని అక్కడక్కడ జంతువుల కోసం అండర్ బ్రిడ్జ్‌లు కూడా ఏర్పాటు చేశారు. ఈ హై వేలో వాహనాల రాకపోకలకు గతంలో పనులు పూర్తి కాక ముందు ఆంక్షలు ఉండేవి. పూర్తి దశకు చేరుకున్న తరువాత ట్రయల్ రన్ చేశారు. అద్భుతంగా ఆకట్టుకోవడంతో ప్రయాణికులు హర్షం వ్యక్తం చేస్తున్నారు. హైవేపై రయ్ రయ్ మంటూ దూసుకెళ్తున్నారు.

చిత్తూరు మార్గంలో రోడ్డుపై వెళ్తున్న వాహనాలు చిత్తూరు తచ్చూరు హైవేపై వాహనాలను బుధవారం నుంచి ట్రయిల్ రన్‌లో భాగంగా పూర్తిస్థాయిలో అనుమతినిచ్చారు. దీంతో పలు వాహనాలు ప్రయాణించాయి. చిత్తూరు నుంచి తమిళనాడులోని ఊత్తుకోట వరకు 95 కిలోమీటర్లు రోడ్డు పనులు పూర్తయ్యాయి. మొత్తం 116 కి.మీ కాగా అందులో పనులు పూర్తవ్వడంతో అధికారులు రాకపోకలకు అవకాశం కల్పించారు. త్వరలో టోల్‌గేట్స్ ప్రారంభం కానున్నట్లు తెలుస్తోంది. ఈ రోడ్డు పై 100 స్పీడ్‌తో 95 కిలోమీటర్ల దూరం 1.30 గంటల్లో చేరుకోవచ్చని అంచనా వేశారు. ఇందులో అనుపల్లె, అరతల, నరసింహరాజపురం, పల్లెపట్లు, నగరి, ఊత్తుకోట, కుమారజపేట, ఎన్ఆరురం, వీరకావేరిరాజపురం, పొంద వక్కం మొత్తం 7 ఇంటర్ చేంజ్‌లు ఉంటాయని అధికారులు తెలిపారు.