Last Updated:
Martial Arts: బొబ్బిలి కోచ్ ప్రసాద్ 2002 నుంచి ఉచిత తైక్వాండో శిక్షణతో 9 వేల మందికి పైగా యువతను తీర్చిదిద్దారు, 23 మంది స్పోర్ట్స్ కోటా ఉద్యోగాలు సాధించారు
విజయనగరం జిల్లా బొబ్బిలి పట్టణంలో గత రెండు దశాబ్దాలుగా ఉచిత తైక్వాండో శిక్షణ అందిస్తూ కోచ్ ప్రసాద్ అనేక మందికి ఆదర్శంగా నిలుస్తున్నారు. 2002 సంవత్సరం నుంచి ఎలాంటి ఫీజు లేకుండా ఈ శిక్షణను కొనసాగిస్తూ వేలాది మంది యువతకు క్రీడా ప్రేరణనిస్తున్నారు. ఇప్పటివరకు సుమారు 9,000 మందికి పైగా విద్యార్థులకు తైక్వాండో శిక్షణ అందించినట్లు ఆయన తెలిపారు.
ఇక్కడ శిక్షణ పొందిన విద్యార్థులలో 23 మంది స్పోర్ట్స్ కోటా ద్వారా ప్రభుత్వ ఉద్యోగాలు సాధించడం విశేషం. అలాగే ఈ శిక్షణ కేంద్రం నుంచి తయారైన క్రీడాకారులు జాతీయ, రాష్ట్ర, జిల్లా స్థాయిల్లో అద్భుత ప్రదర్శన కనబరిచారు. దాదాపు 25 జాతీయ స్థాయిలో, 18 రాష్ట్ర స్థాయిలో, 60 జిల్లా స్థాయిలో పోటీల్లో పాల్గొని పతకాలు సాధించినట్లు కోచ్ ప్రసాద్ వెల్లడించారు.
తైక్వాండో నేర్చుకోవడం ద్వారా పిల్లల్లో శారీరక దృఢత్వం పెరగడమే కాకుండా మానసిక స్థైర్యం, క్రమశిక్షణ కూడా అభివృద్ధి చెందుతుందని ఆయన తెలిపారు. ప్రస్తుత కాలంలో చిన్నారులు ఎక్కువగా మొబైల్ ఫోన్లకు అలవాటు పడుతూ మానసిక ఒత్తిడికి గురవుతున్నారని, ఈ పరిస్థితుల్లో తల్లిదండ్రులు పిల్లలను క్రీడల వైపు మళ్లించడం అత్యవసరమని సూచించారు. ఫిజికల్ యాక్టివిటీస్లో పాల్గొనే పిల్లలు ఆరోగ్యంగా, చురుకుగా ఉండటంతో పాటు వారి భవిష్యత్తు బాగా ఉంటుందని చెప్పారు.
ఈ తైక్వాండో శిక్షణలో నాలుగున్నర సంవత్సరాల వయస్సు నుంచి ఎవరైనా చేరవచ్చని తెలిపారు. బాలురు, బాలికలు, పెద్దలు ఈ శిక్షణను సులభంగా నేర్చుకోవచ్చని పేర్కొన్నారు. ప్రస్తుతం ఆయన బొబ్బిలి షుగర్ ఫ్యాక్టరీలో అసిస్టెంట్గా పనిచేస్తూనే తన ఖాళీ సమయాన్ని వినియోగించి ఈ సేవా కార్యక్రమాన్ని కొనసాగిస్తున్నారు.
శిక్షణ ప్రతిరోజూ బొబ్బిలి సమస్తాన్ హైస్కూల్ మైదానంలో ఉదయం 6 గంటల నుంచి 7 గంటల వరకు, సాయంత్రం 7 నుంచి 8 గంటల వరకు జరుగుతోంది. ముఖ్యంగా ఈ శిక్షణ పూర్తిగా ఉచితంగా అందించబడటం విశేషం. ఆర్థికంగా వెనుకబడిన కుటుంబాలకు చెందిన పిల్లలు కూడా ఎలాంటి ఇబ్బందులు లేకుండా ఇందులో పాల్గొనే అవకాశం కల్పిస్తున్నారు.
ఈ శిక్షణ ద్వారా తయారైన విద్యార్థులు జాతీయ, అంతర్జాతీయ స్థాయిలో కూడా ప్రతిభ చాటుతూ బొబ్బిలి పట్టణానికి పేరు తీసుకువస్తున్నారు. సమాజానికి ఉపయోగపడే విధంగా యువతను తీర్చిదిద్దడంలో కోచ్ ప్రసాద్ చేస్తున్న సేవలు ప్రశంసనీయమని స్థానికులు అభినందిస్తున్నారు
Click here to add News18 as your preferred news source on Google. ఆంధ్రప్రదేశ్లోని ముఖ్యమైన వార్తలు, లేటెస్ట్ న్యూస్, స్థానిక వార్తలు, ప్రభుత్వ పథకాలు, ప్రభుత్వ ప్రకటనలు, అన్ని రాజకీయ పార్టీలకు సంబంధించిన స్టోరీలను న్యూస్18 తెలుగు ఆంధ్రప్రదేశ్ కేటగిరీలో చదవండి. మరిన్ని వార్తల కోసం న్యూస్ 18 తెలుగు ఫాలో అవండి.
Hyderabad,Telangana
Apr 03, 2026 12:43 PM IST
