Gold Fraud: తక్కువ ధరకే గోల్డ్ అంటూ బురిడీ.. చీటీల స్కీమ్ పేరుతో స్కామ్.. కోట్లతో పరార్..! manappuram jewelers chit fund scam. | చిత్తూరు వార్తలు (Chittoor News)

తరుగు, కూలీ లేకుండా తక్కువ ధరకే బంగారం అందిస్తామని చెప్పి వినియోగదారులను ఆకట్టుకున్న సూరజ్, చీటీల రూపంలో నెలనెలా డబ్బులు వసూలు చేసినట్లు తెలుస్తోంది. పట్టణంతో పాటు చుట్టుపక్కల ప్రాంతాల నుంచి అనేక మంది ఈ పథకంలో చేరి పెద్ద మొత్తంలో డబ్బులు పెట్టుబడి పెట్టారు. నమ్మకంతో పెట్టిన ఈ డబ్బులు ఇప్పుడు గాలిలో కలిసిపోయాయని బాధితులు ఆవేదన వ్యక్తం చేస్తున్నారు.

సేకరించిన డబ్బులను సూరజ్ నకిలీ రసీదులు సృష్టించి తన వ్యక్తిగత ఖాతాలకు మళ్లించినట్లు సమాచారం. ఇలా సుమారు రూ.2.5 కోట్లకు పైగా వినియోగదారుల సొమ్మును దారి మళ్లించి, చివరికి సంస్థకే మోసం చేసి పరారైనట్లు ఆరోపణలు వెల్లువెత్తుతున్నాయి. ఈ ఘటన బయటపడటంతో బాధితులు ఒక్కసారిగా షాక్‌కు గురయ్యారు.

చీటీలు పూర్తయ్యాక బంగారం లేదా డబ్బు కోసం వచ్చిన వినియోగదారులకు యాజమాన్యం నుంచి స్పష్టమైన సమాధానం రాకపోవడంతో ఆందోళన మరింత పెరిగింది. ప్రస్తుతం బాధ్యతలు చూస్తున్న మేనేజర్ మోహన్‌ను బాధితులు నిలదీస్తూ తమకు న్యాయం చేయాలని డిమాండ్ చేశారు. మేము సంస్థపై నమ్మకంతోనే పెట్టుబడి పెట్టాం.. ఇప్పుడు మా డబ్బులు ఎక్కడ అంటూ ప్రశ్నించారు.

సమాధానం రాకపోవడంతో బాధితులు దుకాణం ఎదుటే నిరసనకు దిగారు. తమ డబ్బులు తిరిగి చెల్లించేవరకు ఆందోళన కొనసాగిస్తామని హెచ్చరించారు. ఈ ఘటనతో పట్టణంలో భయం, ఆగ్రహం కలగలిసి కనిపిస్తున్నాయి. పెట్టుబడుల విషయంలో జాగ్రత్తగా ఉండాలని పలువురు సూచిస్తున్నారు. ఇప్పటివరకు ఈ ఘటనపై పూర్తి వివరాలు వెల్లడికాకపోయినా, బాధితులు పోలీసులకు ఫిర్యాదు చేసేందుకు సిద్ధమవుతున్నట్లు సమాచారం. ఈ మోసం వెనుక మరింత పెద్ద స్కామ్ ఉందా అనే కోణంలో కూడా విచారణ సాగించే అవకాశం ఉంది. మొత్తం మీద ఈ ఘటన మదనపల్లెలో భారీ చర్చకు దారి తీసింది.