Elephants Death: విద్యుత్ కంచెలకు తగిలి నేలకొరిగిన గజరాజులు.. అమర్చింది ఎవరో తెలుసా..? |

ఆంధ్రప్రదేశ్‌లోని తూర్పుగోదావరి జిల్లాలో పెద్దపులి భయపెడుతుంటే.. తిరుపతి, చిత్తూరు జిల్లాల్లో గజరాజుల గుంపు దడ పుట్టిస్తోంది. సోమవారం ఉదయం తిరుపతి జిల్లా యర్రావారిపాళెం మండలంలో తీవ్ర విషాదకర ఘటన చోటుచేసుకుంది. నెరబైలు పంచాయతీ పరిధిలోని ఫారెస్ట్ బంగ్లా సమీపంలోని విద్యుత్ కంచెలకు తగిలి రెండు ఏనుగులు మృత్యువాతపడ్డాయి.

అడవి ప్రాంతం నుండి నివాస ప్రాంతాలు, పొలల్లోకి తొరబడే అడవి పందుల దాడి నుంచి రక్షించుకునేందుకు స్థానిక రైతులు తమ పంటలను విద్యుత్ కంచెలను ఏర్పాటు చేసినట్లు తెలుస్తోంది. అదే కంచెకు తగిలి రెండు ఏనుగులు మృతిచెందినట్లు అధికారులు భావిస్తున్నారు. ఈ ఘటనతో ఆ ప్రాంతంలో విషాద వాతావరణం నెలకొంది. సమాచారం అందుకున్న ఫారెస్ట్ అధికారులు ఘటన స్థలానికి చేరుకున్నారు. గ్రామస్థులు కూడా పెద్ద సంఖ్యలో అక్కడికి చేరుకుని మృతిచెందిన ఏనుగులను చూసి ఆవేదన వ్యక్తం చేస్తున్నారు.

ఘటనపై సమాచారం అందుకున్న అటవీ శాఖ అధికారులు కేసు నమోదు చేశారు.ఏ పరిస్థితుల్లో ఈ ఘటన జరిగింది, విద్యుత్ కంచె ఎలా ఏర్పాటు చేశారు అనే విషయాలపై అధికారులు విచారణ చేపట్టనున్నారు. పూర్తి వివరాలు సేకరించిన తర్వాత తదుపరి చర్యలు తీసుకుంటామని అటవీ శాఖ అధికారులు తెలిపారు.