Cyber Scam: ఫేస్‌బుక్ పరిచయంతో కొంపమునిగింది.. యువతి మాయమాటలు నమ్మి రూ. కోటి పోగొట్టుకున్న రిటైర్డ్ టీచర్! | ఆంధ్రప్రదేశ్ వార్తలు

పోలీసుల కథనం ప్రకారం.. పల్నాడు జిల్లా సత్తెనపల్లికి చెందిన పొన్నం వెంకటేశ్వర్లు గతేడాది ఆగస్టులో ఉపాధ్యాయుడిగా ఉద్యోగ విరమణ చేశారు. ప్రస్తుతం ఆయన మార్టూరు మండలం కోలలపూడిలోని తన తల్లి వద్ద నివాసముంటున్నారు. సుమారు నెల రోజుల క్రితం ఆయనకు ఫేస్‌బుక్‌లో ‘కందుకూరి మౌనిక’ అనే పేరుతో ఉన్న ఒక ప్రొఫైల్ నుండి ఫ్రెండ్ రిక్వెస్ట్ వచ్చింది. ఆ ఫోటోలు చూసి నిజమేనని నమ్మిన వెంకటేశ్వర్లు ఆమెతో చాటింగ్ చేయడం ప్రారంభించారు. ఆ యువతి తాను యునైటెడ్ కింగ్‌డమ్ (UK)లో ఉంటున్నానని, త్వరలోనే భారతదేశానికి తిరిగి వస్తానని నమ్మబలికింది. ఇండియా వచ్చినప్పుడు తిరుపతి, శ్రీశైలం వంటి పుణ్యక్షేత్రాలను దర్శించుకోవాలని ఉందని, ఆ సమయంలో తనకు సహాయకారిగా ఉండాలని కోరింది. ఆమె మాటలను పూర్తిగా నమ్మిన బాధితుడు తన వ్యక్తిగత వాట్సాప్ నంబర్, ఫోన్ నంబర్లను ఆమెకు ఇచ్చారు.

కొన్ని రోజుల పాటు మామూలుగా చాటింగ్ చేసిన తర్వాత, ఆ మాయలేడి అసలు ప్లాన్ అమలు చేసింది. ఆన్‌లైన్ ట్రేడింగ్ ద్వారా అతి తక్కువ సమయంలో కోట్లాది రూపాయల లాభాలు గడించవచ్చని ఆయనకు ఆశ చూపింది. తన మేనమామ దాసరి నీరజ్‌కుమార్ ఒక ఇంటర్నేషనల్ ట్రేడింగ్ ప్లాట్‌ఫాం ద్వారా గత 16 ఏళ్లుగా ట్రేడింగ్ చేస్తూ భారీగా సంపాదిస్తున్నాడని నమ్మబలికింది. రిటైర్మెంట్ బెనిఫిట్స్ రూపంలో వచ్చిన నగదును ఇందులో పెట్టుబడి పెడితే రెట్టింపు అవుతుందని మభ్యపెట్టింది.

సర్వస్వం కోల్పోయిన బాధితుడు చివరకు మార్టూరు పోలీసులను ఆశ్రయించి ఫిర్యాదు చేశారు. ఈ తరహా మోసాలను ‘ఇన్వెస్ట్‌మెంట్ స్కామ్స్’ అని పిలుస్తారని, గుర్తు తెలియని వ్యక్తులు సోషల్ మీడియాలో పంపే లింకులను క్లిక్ చేయవద్దని పోలీసులు హెచ్చరిస్తున్నారు.