Botsa Satyanarayana: బొత్స సత్యనారాయణకు బిగ్ షాక్.. లీగల్ నోటిసులు పంపిన హెరిటేజ్ ఫుడ్స్ | ఆంధ్రప్రదేశ్ వార్తలు

ఇటీవల మీడియాతో మాట్లాడిన బొత్స సత్యనారాయణ పలు కీలక ఆరోపణలు చేశారు. మహారాష్ట్రలో కార్యకలాపాలు నిర్వహిస్తున్న ఇందాపూర్ డెయిరీ సంస్థ హెరిటేజ్‌కు అనుబంధంగా ఉందని ఆయన పేర్కొన్నారు. ఆ సంస్థ ద్వారానే తిరుమల తిరుపతి దేవస్థానానికి నెయ్యి సరఫరా జరిగిందని తెలిపారు. హెరిటేజ్ 22 కంపెనీలతో కలిసి ఒక సిండికేట్ రూపంలో పనిచేస్తోందని ఆరోపించారు. మార్కెట్లో రూ.320కు లభించే నెయ్యి ధరను రూ.700కు పెంచడం వెనుక అసలు కారణాలు ఏమిటో ప్రజలకు తెలియాలని ప్రశ్నించారు. ధరల పెరుగుదల వల్ల వినియోగదారులు నష్టపోతున్నారని వ్యాఖ్యానించారు.

ఈ ఆరోపణలపై హెరిటేజ్ సంస్థ తీవ్ర అభ్యంతరం వ్యక్తం చేసింది. తమ ఉత్పత్తులు నాణ్యత ప్రమాణాలు పాటిస్తూ తయారవుతున్నాయని తెలిపింది. ధరల విషయంలో మార్కెట్ పరిస్థితులు, ముడి సరుకుల వ్యయం, రవాణా ఖర్చులు వంటి అంశాలు ప్రభావితం చేస్తాయని వివరణ ఇచ్చింది. నిరాధార వ్యాఖ్యలు పెట్టుబడిదారుల విశ్వాసాన్ని దెబ్బతీసే ప్రమాదం ఉందని సంస్థ వర్గాలు అంటున్నాయి. అందుకే చట్టపరమైన మార్గాన్ని ఎంచుకున్నామని స్పష్టం చేశాయి.

ఈ వివాదంపై మాజీ మంత్రి కాకాణి గోవర్ధన్ రెడ్డి కూడా స్పందించారు. హెరిటేజ్, ఇందాపూర్ డెయిరీ మధ్య ఉన్న సంబంధాలపై బహిరంగ చర్చకు సిద్ధమని సవాల్ విసిరారు. ప్రభుత్వం తీసుకువచ్చిన 22ఏ నిర్ణయంపై తీవ్ర విమర్శలు చేశారు. ఆ జీవో కారణంగా రైతులు ఇబ్బందులు పడుతున్నారని అన్నారు. రైతు సంక్షేమం కంటే ఇతర ప్రయోజనాలపై ఎక్కువ దృష్టి పెట్టినట్టు ఆరోపించారు. సంబంధిత అంశాలపై స్పష్టత ఇవ్వాలని ప్రభుత్వాన్ని కోరారు.