AP weather: ఏపీలో వాతావరణం కూల్ కూల్.. భానుడి సెగలకు వరుణుడి బ్రేక్.. పలు జిల్లాల్లో దంచికొట్టిన వర్షం! | ఈస్ట్ గోదావరి వార్తలు (East Godavari News)

విశాఖపట్నం, హైదరాబాద్ వాతావరణ కేంద్రాల సమాచారం ప్రకారం.. ఉపరితల ఆవర్తనం అల్పపీడన ద్రోణి ప్రభావంతో సోమవారం మధ్యాహ్నం నుంచి వాతావరణంలో అనూహ్య మార్పులు సంభవించాయి. నిజానికి ఆదివారం అర్ధరాత్రి నుంచే కొన్ని ప్రాంతాల్లో ఆకాశం మేఘావృతమై ఉండగా, సోమవారం నాటికి అది వర్షంగా మారింది. దీనివల్ల వేసవి తాపం తగ్గి, గాలిలో తేమ పెరగడంతో ఉష్ణోగ్రతలు ఒక్కసారిగా పడిపోయాయి.

ముఖ్యంగా ఉమ్మడి గోదావరి జిల్లాల్లో వర్షం దంచికొట్టింది. కాకినాడ నగరంతో పాటు రూరల్ ప్రాంతాల్లో ఉదయం నుంచే చల్లటి గాలులు వీచాయి. డాక్టర్ బి.ఆర్. అంబేద్కర్ కోనసీమ జిల్లాలోని కొత్తపేట నియోజకవర్గంలో సోమవారం మధ్యాహ్నం 3 గంటల సమయానికి ఆకాశం నల్లటి మేఘాలతో నిండిపోయి, కుండపోత వర్షం కురిసింది. ఈ అకాల వర్షం చూస్తుంటే ఇది ఎండాకాలమా లేక వర్షాకాలమా అన్న సందేహం స్థానికుల్లో కలిగింది. తూర్పుగోదావరి జిల్లాలోని రాజమండ్రి పరిసర ప్రాంతాల్లో అడపా దడపా వర్షాలు కురిసి నేలను తడిపాయి.

ఉత్తరాంధ్రలోని విశాఖపట్నం, అనకాపల్లి, ఎలమంచిలి వంటి ప్రాంతాల్లో భారీ వర్షాలు కురవకపోయినప్పటికీ, ఆకాశం మేఘావృతమై ఉండటం చల్లటి గాలుల వల్ల ప్రజలకు ఎండ వేడి నుంచి గొప్ప ఉపశమనం లభించింది. ఇక రాయలసీమ విషయానికి వస్తే, చిత్తూరు, తిరుపతి జిల్లాల్లో పలుచోట్ల మోస్తరు వర్షాలు నమోదయ్యాయి. తిరుమల వచ్చే భక్తులకు ఈ చల్లటి వాతావరణం ఎంతో హాయిని ఇచ్చింది.

వాతావరణ శాఖ అధికారులు వెల్లడించిన వివరాల ప్రకారం, ఈ అల్పపీడన ద్రోణి ప్రభావం మరో రెండు రోజుల పాటు కొనసాగే అవకాశం ఉంది. దీనివల్ల కోస్తాంధ్ర, రాయలసీమలోని కొన్ని ప్రాంతాల్లో పిడుగులతో కూడిన తేలికపాటి నుంచి మోస్తరు వర్షాలు కురిసే అవకాశం ఉంది. బానుడు తన ప్రతాపాన్ని చూపిస్తున్న ఈ సమయంలో, ఈ నాలుగు రోజుల చల్లదనం ప్రజలకే కాకుండా పశుపక్షాదులకు ప్రాణవాయువులా మారింది.