చిత్రావతి నదిలో ఇసుక అక్రమ రవాణాపై సిపిఐ ఆందోళన..

తాసిల్దార్ కార్యాలయం ఎదుట సిపిఐ ధర్నా – టీడీపీ నేతల మద్దతు

విశాలాంధ్ర – గోరంట్ల: గోరంట్ల మండల పరిధిలోని చిత్రావతి నదిలో రోజురోజుకీ ఇసుక అక్రమ రవాణా పెరుగుతోందని, దీంతో పరివాహక ప్రాంత రైతుల ఫిల్టర్ బోర్లు ఎండిపోతున్నాయని సిపిఐ నాయకులు ఆగ్రహం వ్యక్తం చేశారు. ఈ సమస్యపై పట్టణంలోని తాసిల్దార్ కార్యాలయం ఎదుట మంగళవారం సిపిఐ పార్టీ ఆధ్వర్యంలో ధర్నా నిర్వహించారు. ఈ నిరసన కార్యక్రమానికి సిపిఐ జిల్లా కార్యదర్శి వేమయ్య ముఖ్య అతిథిగా హాజరయ్యారు. ఆసక్తికరంగా, తెలుగుదేశం పార్టీ సీనియర్ నాయకులు, సింగిల్ విండో అధ్యక్షులు రామన్నపల్లి శంకర్ రెడ్డి కూడా కమ్యూనిస్టు నాయకులకు మద్దతుగా ధర్నాలో పాల్గొనడం మండల వ్యాప్తంగా చర్చనీయాంశంగా మారింది.ఈ సందర్భంగా వేమయ్య మాట్లాడుతూ, మండలంలోని రామన్నపల్లి సమీప చిత్రావతి నదిలో టీడీపీకి చెందిన కొందరు నాయకులు ఇసుక మాఫియాకు పాల్పడుతున్నారని ఆరోపించారు. రామన్నపల్లి, పాపిరెడ్డిపల్లి గ్రామాలకు చెందిన సుమారు 200 మంది రైతులు ఈ నదిలోని ఫిల్టర్ బోర్లపై ఆధారపడి వ్యవసాయం చేస్తున్నారని, అయితే అక్రమ ఇసుక రవాణా కారణంగా నీటి వనరులు దెబ్బతింటున్నాయని తెలిపారు.అదే సమయంలో, ఈ ప్రాంతం నుంచి ఇసుకను అక్రమంగా కర్ణాటకకు తరలిస్తున్నారని ఆరోపిస్తూ, అధికారులు తక్షణమే చర్యలు తీసుకోకపోతే రైతుల తరఫున దశలవారీ ఆందోళనలు చేపడతామని హెచ్చరించారు.

తెలుగుదేశం పార్టీ నాయకుడు శంకర్ రెడ్డి మాట్లాడుతూ, రామన్నపల్లి ప్రాంతంలో ఇసుక అక్రమ రవాణా జరుగుతోందని ఇప్పటికే పలుమార్లు పోలీసులకు, ప్రజాప్రతినిధులకు తెలియజేసినా ఫలితం లేకపోయిందని అన్నారు.ఈ సందర్భంగా సిపిఐ నాయకులు తమ డిమాండ్లతో కూడిన వినతిపత్రాన్ని తాసిల్దార్ మధు నాయక్‌కు సమర్పించారు. దీనిపై స్పందించిన తాసిల్దార్, ఇసుక అక్రమ రవాణా జరుగుతున్న ప్రాంతాల్లో వెంటనే సిబ్బందిని నియమించి కఠిన చర్యలు తీసుకుంటామని హామీ ఇచ్చారు.

అనంతరం సిపిఐ జిల్లా కార్యదర్శి వేమయ్య సమక్షంలో పట్టణంలోని చౌడేశ్వరి కాలనీకి చెందిన వెంకటేష్, మల్లికార్జున, నాగమల్లప్ప తదితరులు సిపిఐ పార్టీలో చేరారు. ఈ కార్యక్రమంలో కిష్ట, నాగరాజు, ఆంజనేయులు, సంజీవప్ప, మంజునాథ్, మల్లికార్జున, నరసింహమూర్తి, నరేష్, చాంద్ బాషా తదితరులు పాల్గొన్నారు.