స్కూల్ లేదు.. గుడిలోనే చదువులు.. “మాకు బడి కావాలి” విద్యార్థుల గగ్గోలు వైరల్..! school in rama temple children studying in temple request lokesh. | ఈస్ట్ గోదావరి వార్తలు (East Godavari News)

అనకాపల్లి జిల్లా ఎస్. రాయవరం మండలం కోనవానిపాలెం గ్రామంలో ఉన్న మండల పరిషత్ ప్రాథమిక పాఠశాల పరిస్థితి ఇదే. నాడు-నేడు పథకం కింద అభివృద్ధి పనులు ప్రారంభమైనా అవి మధ్యలోనే ఆగిపోయాయి. స్కూల్ భవనం పూర్తికాకపోవడంతో పిల్లలకు తరగతులు నిర్వహించేందుకు ఉపాధ్యాయులు రామాలయాన్ని ఆశ్రయించాల్సి వచ్చింది. రోజూ చిన్నారులు గుడి ప్రాంగణంలో కూర్చొని పాఠాలు వినడం అక్కడి నిత్య దృశ్యంగా మారిపోయింది.

చదువు కోసం స్కూల్‌కు వెళ్లాల్సిన పిల్లలు, ఇప్పుడు గుడిలోనే చదవాల్సి రావడం తమకు చాలా ఇబ్బందిగా ఉందని విద్యార్థులు చెబుతున్నారు. మాకు సరైన స్కూల్ కావాలి అంటూ వారు విజ్ఞప్తి చేస్తున్నారు. ముఖ్యంగా వేసవి వేడి, సౌకర్యాల లేమి, కూర్చునే స్థలం లేకపోవడం వంటి సమస్యలు చిన్నారులను తీవ్రంగా ఇబ్బంది పెడుతున్నాయి.

పండుగల సమయంలో పరిస్థితి మరింత క్లిష్టంగా మారుతోంది. ముఖ్యంగా శ్రీరామనవమి వంటి వేళల్లో దేవాలయానికి వచ్చే భక్తుల రద్దీ కారణంగా తరగతులు అంతరాయం కలుగుతున్నాయి. కొన్నిసార్లు పిల్లలను బయటకు పంపాల్సి వస్తోందని ఉపాధ్యాయులే అంగీకరిస్తున్నారు. చదువుకునే వాతావరణం లేకపోవడం వల్ల పిల్లల భవిష్యత్తుపై ఆందోళన వ్యక్తమవుతోంది.

ఇలాంటి పరిస్థితుల్లో తమ పిల్లలను స్కూల్‌కు పంపేందుకు తల్లిదండ్రులు కూడా వెనుకంజ వేస్తున్నారు. గదులు లేని పాఠశాలకు ఎలా పంపాలనే ప్రశ్నతో కొత్త అడ్మిషన్లపై ఆసక్తి చూపడం లేదని ఉపాధ్యాయులు చెబుతున్నారు. “తరగతి గదులు లేని స్కూల్‌కి మా పిల్లలను ఎలా పంపాలి?” అని తల్లిదండ్రులు ప్రశ్నిస్తున్నారు.

ప్రభుత్వం విద్యకు పెద్దపీట వేస్తున్నామని చెబుతున్న సమయంలో ఇలాంటి పరిస్థితులు వెలుగులోకి రావడం విమర్శలకు దారితీస్తోంది. స్థానిక ప్రజలు, విద్యార్థులు కలిసి స్పందిస్తూ సమస్యను త్వరగా పరిష్కరించాలని కోరుతున్నారు. వేసవి సెలవులు ముగిసేలోపు స్కూల్ భవన నిర్మాణం పూర్తి చేయాలని డిమాండ్ చేస్తున్నారు.

ఈ నేపథ్యంలో విద్యార్థులు నేరుగా లోకేష్ ను ఉద్దేశించి “సార్ స్పందించండి” అంటూ విజ్ఞప్తి చేస్తున్నారు. చదువుకోవాలనే తపన ఉన్న ఈ చిన్నారులకు కనీస సదుపాయాలు కల్పించడం ప్రభుత్వ బాధ్యత అని వారు చెబుతున్నారు. ఇప్పటికైనా అధికారులు స్పందించి స్కూల్ భవనాన్ని సిద్ధం చేస్తారా అనే ప్రశ్నకు సమాధానం కోసం గ్రామస్తులు ఎదురుచూస్తున్నారు.