సంగీత్ శోభన్, నయన్ సారిక జంటగా ‘రాకాస’.. నవ్వులు, థ్రిల్ల్స్ గ్యారెంటీ..! Rakasa fantasy comedy thriller reveals | విశాఖపట్నం వార్తలు (Visakhapatnam News)

ఈ సినిమా ప్రమోషన్స్‌లో భాగంగా విశాఖపట్నంలోని దసపల్ల హోటల్‌లో చిత్ర బృందం ప్రెస్ మీట్ నిర్వహించింది. నిర్మాత నిహారిక కొణిదెల మాట్లాడుతూ, ఈ సినిమా ప్రేక్షకులను ఖచ్చితంగా అలరిస్తుందని నమ్మకం వ్యక్తం చేశారు. కమిటీ కుర్రాళ్లు విజయానంతరం మరో వినూత్నమైన ఫాంటసీ కామెడీతో ప్రేక్షకుల ముందుకు వస్తున్నామని తెలిపారు. విశాఖ బీచ్ అంటే తనకు ఎంతో ఇష్టమని, ఇక్కడి ఎనర్జీ ఈ సినిమా ప్రమోషన్‌కు మంచి స్టార్ట్ ఇచ్చిందని చెప్పారు.

హీరో సంగీత్ శోభన్ మాట్లాడుతూ, ‘రాకాస’ ఒక కొత్త తరహా ఫాంటసీ కామెడీ థ్రిల్లర్ అని తెలిపారు. హారర్, కామెడీ మేళవింపుతో పాటు ఒక క్యూట్ లవ్ స్టోరీ కూడా ఇందులో ఉంటుందని చెప్పారు. దర్శకుడు విఠలాచార్య స్టైల్‌లో చందమామ కథల మాదిరి ఫీల్ ఈ సినిమాలో కనిపిస్తుందని పేర్కొన్నారు. ప్రేక్షకులకు కొత్త అనుభూతిని ఇచ్చేలా సినిమా రూపొందిందని నమ్మకం వ్యక్తం చేశారు.

హీరోయిన్ నయన్ సారిక మాట్లాడుతూ, ఈ సినిమా ప్రమోషన్స్‌ను విశాఖలో ప్రారంభించడం ఆనందంగా ఉందన్నారు. విశాఖ తనకు ప్రత్యేకమైన నగరమని, ఈ సినిమాలో ఉన్న కామెడీ, ఎమోషన్ ప్రేక్షకులను బాగా ఆకట్టుకుంటాయని చెప్పారు. పిల్లల నుంచి పెద్దల వరకు అందరూ ఎంజాయ్ చేసేలా ‘రాకాస’ తెరకెక్కిందని తెలిపారు.

నటుడు గెటప్ శ్రీను మాట్లాడుతూ, ఈ సినిమాలో ఫాంటసీ కామెడీ అద్భుతంగా వర్కౌట్ అయ్యిందన్నారు. సంగీత్ శోభన్ నటన ప్రేక్షకులను ఆకట్టుకుంటుందని, చిత్ర బృందం మొత్తం ఎంతో కష్టపడి పని చేసిందని చెప్పారు. సీనియర్ నటులు బ్రహ్మాజీ, తనికెళ్ల భరణి వంటి వారి పాత్రలు సినిమాకు ప్రత్యేక ఆకర్షణగా నిలుస్తాయని తెలిపారు. మొత్తంగా ‘రాకాస’ ఒక ఎంటర్టైనింగ్ ప్యాకేజ్‌గా ప్రేక్షకుల ముందుకు రాబోతోందని చిత్ర యూనిట్ ధీమా వ్యక్తం చేస్తోంది.