షాంపూ స్నానం నుంచి హెయిర్ కట్ వరకు.. పెంపుడు జంతువులకు ప్రత్యేక స్పా..! Special spa services for pets in Visakha receive good response from owners | విశాఖపట్నం వార్తలు (Visakhapatnam News)

విశాఖపట్నం నగరంలో కూడా పెంపుడు జంతువుల కోసం ప్రత్యేక స్పా సేవలు అందుబాటులోకి వచ్చాయి. ఇక్కడ కుక్కలు, పిల్లులకు ప్రత్యేకంగా స్నానం చేయించడం, షాంపూలతో శుభ్రపరచడం, హెయిర్ కట్ చేయడం, గోళ్లు కత్తిరించడం, చెవులను శుభ్రం చేయడం వంటి అనేక రకాల సేవలను అందిస్తున్నారు. పెంపుడు జంతువులకు సౌకర్యంగా ఉండేలా ప్రత్యేక జాగ్రత్తలతో ఈ సేవలను నిర్వహిస్తున్నారు.

సుమారు ఏడాది క్రితం ప్రారంభమైన ఈ పెట్ స్పా సెంటర్‌ను కార్తీక్ నిర్వహిస్తున్నారు. పెంపుడు కుక్కలకు స్నానం చేయించడం నుంచి హెయిర్ కట్ వరకు అనేక సేవలను అందిస్తూ ఈ సెంటర్‌కు మంచి స్పందన లభిస్తున్నదని ఆయన తెలిపారు. రోజుకు కనీసం మూడు పెంపుడు కుక్కలకు స్పా సేవలు అందిస్తున్నామని, పెంపుడు జంతువుల యజమానుల నుంచి మంచి ఆదరణ లభిస్తోందని చెప్పారు.

పెంపుడు జంతువులకు స్పా చేయడం సాధారణ పని కాదని, మనుషుల కంటే ఎక్కువ జాగ్రత్తలు తీసుకోవాల్సి ఉంటుందని కార్తీక్ వివరించారు. ప్రతి కుక్కకు, ప్రతి జంతువుకు ప్రత్యేకమైన ట్రీట్మెంట్ అవసరమని, వాటి స్వభావాన్ని బట్టి సేవలు అందించాల్సి ఉంటుందని చెప్పారు. ముఖ్యంగా స్నానం చేయించే సమయంలో కొన్ని జంతువులు అసౌకర్యంగా భావిస్తాయని, అందుకే వాటిని భయపడకుండా ఎంతో శ్రద్ధగా నిర్వహిస్తామని తెలిపారు.

స్పా సేవలకు కూడా వేర్వేరు ఛార్జీలు ఉంటాయి. సాధారణంగా చిన్న పెంపుడు కుక్కలకు చేసే స్పా సేవలకు సుమారు రూ.500 వరకు తీసుకుంటారు. అయితే పెద్ద జాతికి చెందిన కుక్కలకు ప్రత్యేకమైన స్పా సేవలు అందించాలంటే రూ.900 వరకు ఛార్జీలు ఉంటాయని నిర్వాహకుడు తెలిపారు. ఒక్కో జంతువుకు పూర్తి స్పా చేయడానికి దాదాపు గంట నుంచి గంటన్నర సమయం పడుతుందని చెప్పారు.

అంతేకాకుండా పెంపుడు జంతువుల కోసం హోమ్ స్పా సదుపాయం కూడా అందుబాటులో ఉందని కార్తీక్ తెలిపారు. అవసరమైతే యజమానుల ఇంటికే వెళ్లి స్పా సేవలు అందిస్తామని చెప్పారు. విశాఖపట్నంలోని ఇసుకతోట హైవే పక్కన ఉన్న ఈ పెట్ స్పా సెంటర్‌కు వారాంతాల్లో కూడా మంచి రద్దీ ఉంటుందని, పెంపుడు జంతువులను ప్రేమించే వారి కోసం ఈ సేవలను అందిస్తున్నామని నిర్వాహకుడు తెలిపారు.