వేసవిలో పెరుగుతోన్న టీబీ ప్రమాదం.. దగ్గు, జ్వరం, బరువు తగ్గితే వెంటనే ఈ టెస్ట్ చేయించుకోండి..! TB cases rising even in summer. | విశాఖపట్నం వార్తలు (Visakhapatnam News)

విశాఖపట్నానికి చెందిన సీనియర్ వైద్యులు, మెడికల్ ఆఫీసర్ షేఖ్ సబీన భాను మాట్లాడుతూ, టిబి వ్యాధిని గుర్తించడం చాలా సులభమని పేర్కొన్నారు. రెండు రోజులకు పైగా దగ్గు కొనసాగడం, కఫం రావడం, సాయంత్రం వేళల్లో జ్వరం రావడం, ఆకలి తగ్గిపోవడం, వేగంగా బరువు తగ్గడం, రాత్రి వేళల్లో చెమటలు పడటం వంటి లక్షణాలు కనిపిస్తే వెంటనే వైద్యులను సంప్రదించాల్సిన అవసరం ఉందని తెలిపారు. ఈ లక్షణాలను అలక్ష్యం చేస్తే వ్యాధి ముదిరే ప్రమాదం ఉందని హెచ్చరించారు.

టిబి ప్రధానంగా ఊపిరితిత్తులను ప్రభావితం చేసే అంటువ్యాధి. ఒక వ్యక్తి దగ్గినప్పుడు లేదా తుమ్మినప్పుడు గాలిలోకి వెళ్లే సూక్ష్మ చుక్కల ద్వారా ఈ వ్యాధి సులభంగా మరొకరికి వ్యాపిస్తుంది. అందుకే జనసమ్మర్థ ప్రాంతాల్లో, దుమ్ము ఎక్కువగా ఉన్న ప్రదేశాల్లో మాస్క్ ధరించడం ఎంతో అవసరం. ముఖ్యంగా బయటకు వెళ్లినప్పుడు జాగ్రత్తలు తీసుకోవాలని వైద్యులు సూచిస్తున్నారు. ఈ వ్యాధి నిర్ధారణకు ఆధునిక పరీక్షలు అందుబాటులో ఉన్నాయి. బల్గమ్ పరీక్ష, ఛాతీ ఎక్స్‌రే, CBNAAT వంటి పరీక్షల ద్వారా టిబిని సులభంగా గుర్తించవచ్చు. ముందుగానే గుర్తిస్తే పూర్తిగా నయం చేయగల వ్యాధి ఇది. కాబట్టి భయపడకుండా సరైన సమయంలో వైద్య చికిత్స తీసుకోవడం చాలా ముఖ్యమని నిపుణులు చెబుతున్నారు.

వేసవికాలంలో తీసుకునే అలవాట్లు కూడా టిబి ప్రమాదాన్ని పెంచే అవకాశముందని వైద్యులు సూచిస్తున్నారు. ముఖ్యంగా ఎక్కువసేపు ఏసీ లేదా కూలర్ ముందు ఉండడం, చల్లని నీటిని ఎక్కువగా తాగడం వంటి అలవాట్లు ఆరోగ్యంపై ప్రతికూల ప్రభావం చూపుతాయని అంటున్నారు. కూలర్ నుంచి వచ్చే గాలిలో దుమ్ము ఉండే అవకాశం ఉన్నందున దానికి దూరంగా ఉండడం మంచిదని సూచిస్తున్నారు. టిబి నివారణలో ఆహారం కూడా కీలక పాత్ర పోషిస్తుంది. ముఖ్యంగా హై ప్రోటీన్ ఫుడ్ తీసుకోవడం ద్వారా శరీరంలో రోగనిరోధక శక్తి పెరుగుతుంది. గుడ్లు, పాలు, పప్పులు, మాంసాహారం వంటి పోషకాహారం తీసుకోవడం ద్వారా శరీరం బలపడుతుంది. బలమైన ఇమ్యూనిటీ ఉంటే టిబి వంటి వ్యాధులు దరిచేరే అవకాశాలు తగ్గుతాయి.

ప్రజలు ఆరోగ్యంపై అవగాహన పెంచుకుని, చిన్న లక్షణాలనైనా నిర్లక్ష్యం చేయకుండా వెంటనే వైద్యులను సంప్రదిస్తే టిబిని పూర్తిగా అదుపులో ఉంచవచ్చని వైద్యులు స్పష్టం చేస్తున్నారు. ముందస్తు జాగ్రత్తలు, సరైన ఆహారం, సమయానికి పరీక్షలు—ఈ మూడు పాటిస్తే టిబి వంటి వ్యాధులను సులభంగా జయించవచ్చని వారు సూచిస్తున్నారు.