విశాఖపట్నం ఐఎఫ్‌ఆర్–2026 సిటీ పరేడ్ ఏర్పాట్లపై కలెక్టర్ సమీక్ష. IFR 2026 city parade arrangements reviewed by Collector Harendhira Prasad. | విశాఖపట్నం వార్తలు (Visakhapatnam News)

వీఎంఆర్డీఏ కమిషనర్ తేజ్ భరత్, జీవీఎంసీ అధికారులు, ఇతర విభాగాల ప్రతినిధులతో కలిసి కలెక్టర్ క్షేత్రస్థాయిలో పర్యటించారు. కాళీమాత ఆలయం నుంచి వైఎంసీఏ వరకు ప్రధాన వేదిక, వీఐపీ సిట్టింగ్, వాహనాల రాకపోకలు, బారికేడింగ్, క్యూలైన్లు, పార్కింగ్ సదుపాయాలు, కంట్రోల్ రూమ్ ఏర్పాట్లు వంటి అంశాలను ఒక్కొక్కటిగా సమీక్షించారు. అన్ని శాఖలు సమన్వయంతో పనిచేసి కార్యక్రమాన్ని విజయవంతం చేయాలని ఆదేశించారు.

జెట్టీ ప్రాంతంలో ఉన్న పడవలను తాత్కాలికంగా ఇతర ప్రాంతాలకు తరలించాలని సూచించిన కలెక్టర్, ఫైర్ షో, డ్రోన్ షో నిర్వహణకు అవసరమైన అనుమతులు ముందుగానే పొందాలని తెలిపారు. కమ్యూనికేషన్ లో ఎలాంటి లోపాలు రాకుండా అదనపు వైర్‌లెస్ సెట్లు సిద్ధంగా ఉంచాలని అధికారులను ఆదేశించారు. కార్యక్రమ నిర్వహణలో ప్రతి దశలో ముందస్తు చర్యలు ఉండాలని చెప్పారు.

ప్రజల ఆరోగ్యం, భద్రతకు అత్యధిక ప్రాధాన్యత ఇవ్వాలని స్పష్టం చేస్తూ, ప్రాంగణంలో ఫస్ట్ ఎయిడ్ కిట్లు, మెడికల్ క్యాంపులు, స్ట్రెచర్లతో కూడిన అంబులెన్సులు సిద్ధంగా ఉండాలని చెప్పారు. ఏపీఐఐసీ గ్రౌండ్ వద్ద లెవెలింగ్ పనులు, లైటింగ్, పొదల తొలగింపు వెంటనే పూర్తి చేయాలని ఆదేశించారు. కార్యక్రమాన్ని స్పష్టంగా వీక్షించేందుకు భారీ ఎల్‌ఈడీ స్క్రీన్లు, లైవ్ స్ట్రీమింగ్ సదుపాయం కల్పించాలని సూచించారు.

పారిశుద్ధ్య చర్యలపై ప్రత్యేక దృష్టి పెట్టాలని, సాధారణ ప్రజల కోసం 100 మొబైల్ టాయిలెట్లు, పార్కింగ్ ప్రాంతాల్లో అదనపు టాయిలెట్లు ఏర్పాటు చేయాలని చెప్పారు. బీచ్ వైపు కనీసం వెయ్యి మంది వీక్షించగలిగేలా ప్రత్యేక ఎన్‌క్లోజర్లు ఏర్పాటు చేయాలని ఆదేశించారు. కార్యక్రమం ప్రశాంతంగా, క్రమబద్ధంగా సాగేందుకు ప్రజలు కూడా సహకరించాలని కలెక్టర్ విజ్ఞప్తి చేశారు. నేవీ, జీవీఎంసీ, వీఎంఆర్డీఏ, రెవెన్యూ శాఖల అధికారులు ఈ పర్యటనలో పాల్గొన్నారు.