విశాఖపట్నం ఆరిలోవలో వరుస హత్యలు స్థానికుల్లో భయాందోళన. Arilovala serial murders Police investigation reveals Demudu truth | విశాఖపట్నం వార్తలు (Visakhapatnam News)

ఆరిలోవ బాలాజీ నగర్ సమీపంలోని అన్నానగర్‌లో బురదపాటి దేముడు, దుర్గ దంపతులు కొంతకాలంగా నివాసం ఉంటున్నారు. జీవనోపాధి కోసం ఇద్దరూ నగరంలోని ఒక బట్టల దుకాణంలో పనిచేస్తున్నారు. సాధారణంగా ప్రతిరోజూ విధులకు వెళ్లే దుర్గ మంగళవారం ఉదయం పనికి రాకపోవడంతో సహోద్యోగులు ఆమెకు ఫోన్ చేశారు. పలుమార్లు ఫోన్ చేసినప్పటికీ స్పందన లేకపోవడంతో అనుమానం వచ్చిన సహోద్యోగులు కుటుంబ సభ్యులకు సమాచారం అందించారు.

కుటుంబ సభ్యులు ఇంటికి వెళ్లి చూడగా దుర్గ మెడపై గాయాలతో అచేతనంగా పడిఉండటం చూసి షాక్‌కు గురయ్యారు. వెంటనే మృతురాలి తండ్రి కె. నరసింహులు ఆరిలోవ పోలీసులకు సమాచారం ఇవ్వడంతో పోలీసులు సంఘటనా స్థలానికి చేరుకున్నారు. ఇంటిని పరిశీలించిన పోలీసులు గాలింపు చేపట్టగా మృతురాలి భర్త దేముడు ఫ్రిడ్జ్ వెనుక దాక్కుని ఉండటం గమనించి అదుపులోకి తీసుకున్నారు.

పోలీసుల విచారణలో దేముడు నిజాన్ని ఒప్పుకున్నాడు. గత కొంతకాలంగా భార్యాభర్తల మధ్య తరచూ గొడవలు జరుగుతున్నాయని, అనుమానం కారణంగా ఆగ్రహానికి లోనై చున్నీతో మెడ బిగించి హత్య చేసినట్లు తెలిపాడు. పోలీసులు మృతదేహాన్ని పోస్టుమార్టం నిమిత్తం కేజీహెచ్‌కు తరలించి, నిందితుడిని అదుపులోకి తీసుకుని కేసు దర్యాప్తు కొనసాగిస్తున్నట్లు ఆరిలోవ సీఐ హెచ్. మల్లేశ్వరరావు వెల్లడించారు.

ఇటీవలి కాలంలో వరుస హత్యా ఘటనలు చోటుచేసుకోవడంతో ఆరిలోవ ప్రాంత ప్రజలు తీవ్ర భయభ్రాంతులకు గురవుతున్నారు. ఒక కేసు మిస్టరీ వీడకముందే మరో హత్య వెలుగులోకి రావడం స్థానికుల్లో ఆందోళనను మరింత పెంచింది. పోలీసులు గస్తీని పెంచి పరిస్థితిని కట్టడి చేసే ప్రయత్నాలు చేస్తున్నారు.