వారం రోజుల పాటు వాడిపోని గులాబీ.. గోదావరి జిల్లాలో ఈ పూలకు బంపర్ డిమాండ్..! Kakinada Nanaji Sonti Gulabielu new trend in Pooja Market. | ఈస్ట్ గోదావరి వార్తలు (East Godavari News)

కాకినాడ జిల్లా పరిధిలో తుని నర్సీపట్నం రహదారిపై ఉన్న మరువాడ గ్రామ శివారులో రైతు నానాజీ ఈ ప్రత్యేక గులాబీల సాగు చేపట్టి మంచి ఫలితాలు సాధిస్తున్నారు. మొదట ఈ రకం పువ్వులు మార్కెట్‌లో కనిపించడంతో ఆసక్తి కలిగి వాటి మొక్కలను తెప్పించి ప్రయోగాత్మకంగా నాటారు. పువ్వులు బాగా పూయడం, రేకులు ఊడిపోకుండా ఎక్కువ రోజులు నిలవ ఉండటంతో సాగును విస్తరించాలని నిర్ణయించుకున్నారు.

మధ్యవర్తి సహాయంతో బెంగళూరు నుంచి సుమారు 500 మొక్కలను ఒక్కొక్కటి రూ.35 చొప్పున కొనుగోలు చేసి తోటను ఏర్పాటుచేశారు. ప్రస్తుతం ప్రతిరోజూ 4 వేల నుంచి 6 వేల వరకు పువ్వులు దిగుబడి వస్తున్నాయని రైతు చెబుతున్నారు. మార్కెట్‌లో ఈ గులాబీలకు మంచి స్పందన ఉండటంతో వ్యాపారులు ముందుగానే బుకింగ్స్ చేసుకుంటున్నారని తెలిపారు.

సాధారణ గులాబీలతో పోలిస్తే ఈ సొంటి గులాబీలు వెడల్పుగా, దట్టమైన రేకులతో ఆకర్షణీయంగా కనిపిస్తాయి. ముఖ్యంగా పూజా కార్యక్రమాలు, ఆలయ అలంకరణ, ప్రత్యేక దినాల్లో ఈ పువ్వులను ఎక్కువగా కొనుగోలు చేస్తున్నారు. గురువారం రోజున బాబా పూజలు, భక్తి కార్యక్రమాల కోసం గోదావరి జిల్లాల్లో భారీగా అమ్ముడవుతున్నాయని రైతు నానాజీ వెల్లడించారు.

రైతుల వద్ద కేజీకి రూ.100 నుంచి రూ.200 మధ్య ధరకు విక్రయిస్తుండగా, రిటైల్ మార్కెట్‌లో వ్యాపారులు మరింత ధరకు అమ్ముతున్నట్లు తెలుస్తోంది. ఎక్కువ రోజులు తాజాగా ఉండటం, అందమైన ఆకారం, గట్టిగా నిలిచే రేకులు ఈ మూడు కారణాల వల్లే ఈ సొంటి గులాబీలు ఇప్పుడు పూజా మార్కెట్‌లో కొత్త ట్రెండ్‌గా మారాయి. ఒకసారి చూసిన వారు మళ్లీ ఇవే కొనాలనుకునేలా ఈ పువ్వులు ప్రత్యేక ఆకర్షణగా నిలుస్తున్నాయి.