పగటిపూట రెక్కీ.. రాత్రికి చోరీ.. వేసవిలో దొంగల కొత్త టార్గెట్స్ ఇవే..! Attack on retired teacher house in Kakinada 250g gold looted. | ఈస్ట్ గోదావరి వార్తలు (East Godavari News)

ఇలాంటి ఘటన తాజాగా కాకినాడ జిల్లా సామర్లకోటలో చోటుచేసుకుంది. స్థానిక అంబటి వారి తోట ప్రాంతంలో నివసించే రిటైర్డ్ ఉపాధ్యాయురాలు లక్ష్మీదేవి ఇంటిని దొంగలు టార్గెట్ చేశారు. ఇటీవలే ఆమె తన బంగారం లాకర్ నుంచి తీసుకువచ్చి ఇంట్లో ఉంచారు. బంధువుల వివాహానికి వెళ్లే సమయంలో కొంత బంగారం ధరించి, మిగతాదాన్ని ఇంట్లోనే ఉంచి వెళ్లారు.

వివాహం అనంతరం ఆమెకు అనారోగ్యం రావడంతో మరికొన్ని రోజులు బయటే ఉండాల్సి వచ్చింది. ఈ సమయంలో ఇంటికి తాళం వేసి ఉండడాన్ని గమనించిన దుండగులు ఇంట్లోకి చొరబడి చోరీకి పాల్పడ్డారు. బంగారం, వెండి ఆభరణాలు అపహరించి పరారయ్యారు. విషయం తెలుసుకున్న పోలీసులు వెంటనే సంఘటనా స్థలానికి చేరుకుని కేసు నమోదు చేశారు.

సమాచారం అందుకున్న బాధితురాలు మరుసటి రోజు ఇంటికి చేరుకుని పరిస్థితిని చూసి లబోదిబోమంటున్నారు. సుమారు 250 గ్రాముల బంగారం, రెండు కేజీలకు పైగా వెండి పోయిందని ఆమె తెలిపారు. సాధారణంగా బంగారం లాకర్‌లోనే ఉంచేదాన్నని, ఈసారి పెళ్లి కారణంగా ఇంటికి తెచ్చుకోవడం వల్ల ఈ దుర్ఘటన జరిగిందని ఆమె ఆవేదన వ్యక్తం చేశారు. దొంగిలించిన ఆభరణాలను పోలీసులు తిరిగి రికవరీ చేయాలని కోరుతున్నారు.

ఈ ఘటనతో మరోసారి తాళం వేసిన ఇళ్లపై దొంగల కన్ను ఉంటుందన్న విషయం స్పష్టమైంది. ఒకటి రెండు రోజులు ఇల్లు మూసి ఉంటేనే దుండగులు గమనించి టార్గెట్ చేస్తారని పోలీసులు చెబుతున్నారు. అందుకే బయటకు తాళం కనిపించకుండా జాగ్రత్తలు తీసుకోవాలని, పొరుగువారికి సమాచారం ఇవ్వాలని సూచిస్తున్నారు.

మొత్తంగా ఎండాకాలం, సెలవుల సమయంలో ఇళ్ల భద్రతపై ప్రజలు మరింత అప్రమత్తంగా ఉండాల్సిన అవసరం ఉంది. చిన్న నిర్లక్ష్యం పెద్ద నష్టానికి దారి తీస్తుందని ఈ ఘటన మరోసారి గుర్తు చేసింది.