తిరుమల: సుప్రీంకోర్టు ప్రధాన న్యాయమూర్తి జస్టిస్ సూర్యకాంత్ ఆదివారం పవిత్ర తిరుమల క్షేత్రాన్ని సందర్శించి శ్రీ వేంకటేశ్వర స్వామిని దర్శించుకున్నారు. ఆయనకు టీటీడీ చైర్మన్ బి.ఆర్. నాయుడు, ఈవో ముద్దాడ రవిచంద్ర, అదనపు ఈవో సి.హెచ్. వెంకయ్య చౌదరి, జిల్లా ఎస్పీ ఎల్. సుబ్బారాయుడుతో సహా అధికారులు ఘన స్వాగతం పలికారు.
ఆలయంలో అర్చకులు వేదమంత్రాలతో ఆయనకు స్వాగతం పలికారు. జస్టిస్ సూర్యకాంత్ స్వామివారి సన్నిధిలో ప్రత్యేక దర్శనం చేసుకుని, దేశ శ్రేయస్సు, ప్రజల సౌభాగ్యం కోసం ప్రార్థనలు చేశారు. అనంతరం, అర్చకులు ఆయనకు శేషవస్త్రం కప్పి సత్కరించారు. వేదపండితులు వేదాశీర్వచనం అందించారు. టీటీడీ అధికారులు తీర్థప్రసాదాలు, స్వామివారి చిత్రపటాన్ని ఆయనకు అందజేశారు.
ఈ పుణ్యసందర్భంలో టీటీడీ సీవీఎస్వో మురళీకృష్ణతో పాటు పలువురు ఉన్నతాధికారులు పాల్గొన్నారు. ప్రధాన న్యాయమూర్తి శ్రీ వరాహస్వామి ఆలయాన్ని కూడా దర్శించుకుని ప్రత్యేక ప్రార్థనలు నిర్వహించారు. భక్తిశ్రద్ధలతో ఆధ్యాత్మిక వాతావరణంలో ఈ పర్యటన జరిగింది.
