గోదావరి ఒడ్డున శబరిమల వైభవం.. ఘనంగాఅయ్యప్ప జయంతి ఉత్సవాలు..! ayyappa jayanthi celebrations on godavari river bank with grandeur like sabarimala. | ఈస్ట్ గోదావరి వార్తలు (East Godavari News)

హరిహరసుతుడైన అయ్యప్పస్వామిపై తెలుగు భక్తుల విశ్వాసం ఎంత గొప్పదో ఈ వేడుకలు మరోసారి నిరూపించాయి. 45 రోజుల దీక్షను ఎంతో నియమ నిష్ఠలతో పాటించే భక్తులు, జయంతి రోజు ప్రత్యేక పూజలు నిర్వహించడం ఆనవాయితీగా కొనసాగుతోంది. కేరళలో పంబా నదిలో జరిగే చక్రస్నానాన్ని పోలి, ఈసారి గోదావరి ఒడ్డున కూడా అదే తరహాలో ఉత్సవాలు నిర్వహించడం విశేషం.

అంబేద్కర్ కోనసీమ జిల్లాలోని ఆలమూరు మండలం బడుగు వాణిలంక వద్ద గోదావరి తీర ప్రాంతం భక్తులతో కిటకిటలాడింది. స్వామివారి ఉత్సవ మూర్తిని తలపై మోసుకుంటూ భక్తులు ఊరేగింపుగా నది తీరానికి చేరుకున్నారు. ప్రత్యేకంగా ఏర్పాటు చేసిన వేదికపై స్వామివారికి గోదావరి జలాలతో అభిషేకం నిర్వహించారు. ఈ వేడుకల్లో ప్రజాప్రతినిధులు కూడా పాల్గొని భక్తి భావాన్ని పంచుకున్నారు.

ఈ ఉత్సవాల సందర్భంగా గోదావరి ప్రాంతం అంతా “స్వామియే శరణం అయ్యప్ప” నినాదాలతో మారుమోగిపోయింది. మేళ తాళాలు, భజనలు, సంప్రదాయ వాయిద్యాల మధ్య జరిగిన కార్యక్రమాలు భక్తులను మరో లోకానికి తీసుకెళ్లాయి. ప్రతి క్షణం భక్తి పారవశ్యంలో మునిగిపోయినట్టుగా అనిపించింది.

ముమ్మిడివరంలో కూడా అయ్యప్పస్వామి జన్మనక్షత్రాన్ని పురస్కరించుకుని ప్రత్యేక ఊరేగింపులు నిర్వహించారు. ఆలయానికి రాలేని భక్తులకు స్వామివారి దర్శనం కల్పించేలా ప్రధాన వీధుల్లో స్వామివారి విగ్రహాన్ని తీసుకువచ్చారు. స్వామిని ఒక్కసారి దర్శించుకుని నమస్కరిస్తే చాలు, మనసులో కోరుకున్న కోరికలు నెరవేరుతాయని గురుస్వాములు తెలిపారు.

మొత్తానికి ఈ ఏడాది గోదావరి జిల్లాల్లో జరిగిన అయ్యప్పస్వామి జయంతి ఉత్సవాలు కేరళ శబరిమల వేడుకలకు ఏమాత్రం తీసిపోకుండా అత్యంత ఘనంగా నిర్వహించబడ్డాయి. భక్తి, సంప్రదాయం, సామూహిక ఉత్సాహం కలిసిన ఈ వేడుకలు భక్తుల హృదయాల్లో చిరస్థాయిగా నిలిచిపోతాయి.