కాలం మారినా పేరు మారలేదు.. విజయనగరంలో హాట్ టాపిక్ ఈ షాప్..! ayurvedic shop running for four generations in vijayanagaram |

ఈ ప్రత్యేకమైన పేరుకి వెనుక ఒక ఆసక్తికర కథ ఉంది. పూర్వం విజయరామ రాజు (Vijayarama Raju) పాలనలో పట్టాభి రామయ్య అనే ఆయుర్వేద వైద్యుడు పనిచేసేవారు. రాజకుటుంబానికి వైద్యం అందిస్తూ మంచి పేరు తెచ్చుకున్న ఆయన, పొడవుగా సన్నగా ఉండటంతో రాజు సరదాగా ‘వానపాము’ అనే బిరుదు ఇచ్చారని చెబుతారు. ఆ పేరు క్రమంగా ప్రజల్లో ప్రాచుర్యం పొంది, “వానపాము దగ్గరకు వెళ్తే నయం అవుతారు” అనే నమ్మకంగా మారిపోయింది.

ఇదీ చదవండి:

కాలక్రమేణా అదే పేరు పట్టాభి రామయ్య గుర్తింపుగా మారి, ఆయన వారసులు ఆ పేరుతోనే షాప్‌ను ప్రారంభించారు. నేటికీ విజయనగరం (Vizianagaram) పట్టణంలోని గంటస్తంభం వద్ద ఉన్న ఈ ‘వానపాము షాప్’ నాలుగు తరాలుగా అదే కుటుంబం నిర్వహిస్తోంది. ప్రస్తుతం షాప్ యజమాని లక్ష్మీనారాయణ చెబుతున్నట్లుగా, ప్రభుత్వం నుంచి లైసెన్స్ పొందిన ఈ దుకాణంలో అన్ని రకాల ఆయుర్వేద వనమూలికలు, ఔషధాలు అందుబాటులో ఉన్నాయి.

ప్రత్యేకంగా చిన్నపిల్లల ఆరోగ్య సమస్యలకు సంబంధించిన మందులు ఇక్కడ మంచి ఫలితాలు ఇస్తాయని స్థానికులు విశ్వసిస్తున్నారు. ఉత్తరాంధ్రలోని అనేక ప్రాంతాల నుంచి ప్రజలు ప్రత్యేకంగా ఇక్కడికి వచ్చి మందులు తీసుకెళ్తుంటారు. ఇతర చోట్ల దొరకని అరుదైన వనమూలికలు కూడా ఈ షాప్‌లో లభిస్తాయని వినియోగదారులు చెబుతున్నారు. “ఆయుర్వేదానికి సంబంధించిన ఏ మందు అయినా ఇక్కడ దొరుకుతుంది” అనే నమ్మకం ప్రజల్లో బలంగా ఉంది.

నేటి ఆధునిక వైద్య విధానాలు ఎంత అభివృద్ధి చెందినా, సంప్రదాయ ఆయుర్వేదంపై ప్రజల విశ్వాసం తగ్గలేదని ‘వానపాము షాప్’ కథ స్పష్టంగా చెబుతోంది. నాలుగు తరాలుగా కొనసాగుతున్న ఈ దుకాణం విజయనగరానికి ఒక ప్రత్యేక గుర్తింపుగా నిలిచింది. విశ్వాసం, సంప్రదాయం, సేవ ఈ మూడు కలిస్తే ఎలా ఒక బ్రాండ్‌గా మారుతుందో ఈ కథ చూపిస్తోంది.