ఆ జిల్లాలో వర్షాల విలయం.. రోడ్లు జలమయం, కూలిన వృక్షాలు.. రైతులకు టెన్షన్, ప్రజలకు ఇబ్బందులు..! Andhra Pradesh heavy rains. | ఈస్ట్ గోదావరి వార్తలు (East Godavari News)

విశాఖ వాతావరణ శాఖ ముందస్తు హెచ్చరికల మేరకు తూర్పుగోదావరి, కాకినాడ, కోనసీమ, అనకాపల్లి, ఉమ్మడి పశ్చిమగోదావరి జిల్లాల్లో వర్షాలు మరింత ఉద్ధృతంగా కురుస్తున్నాయి. ముఖ్యంగా కాకినాడ జిల్లాలో పరిస్థితి ఆందోళనకరంగా మారింది. బుధవారం మధ్యాహ్నం నుంచి కురిసిన కుండపోత వర్షానికి సామర్లకోట, పిఠాపురం, చేబ్రోలు, ప్రత్తిపాడు, తుని వంటి ప్రాంతాలు నీటమునిగాయి. రహదారులపై నీరు మోకాలికి పైగా చేరడంతో వాహనాల రాకపోకలు దాదాపు నిలిచిపోయాయి.

అంతేకాదు, భారీ గాలులు, పిడుగులతో కలిసి వచ్చిన ఈ వర్షాలు చెట్లను నేలకూల్చాయి. రోడ్లపై భారీగా చెట్లు పడిపోవడంతో ట్రాఫిక్‌కు అంతరాయం ఏర్పడింది. కొన్ని ప్రాంతాల్లో పిడుగులు పడటంతో పచ్చని చెట్లు కాలిపోయిన దృశ్యాలు ప్రజలను కలవరపరుస్తున్నాయి. వడగళ్ల వాన కూడా చోటుచేసుకోవడంతో పరిస్థితి మరింత క్లిష్టంగా మారింది.

ఈ వర్షాలు ప్రజలకు ఉపశమనం కలిగించినా, రైతులకు మాత్రం పెద్ద కష్టంగా మారాయి. ముఖ్యంగా మామిడి, జీడిమామిడి పంటలు కోత దశలో ఉండగా ఈ వర్షాలు నష్టాన్ని మిగుల్చే పరిస్థితి ఏర్పడింది. పండ్ల నాణ్యత దెబ్బతినే ప్రమాదం ఉందని రైతులు ఆందోళన వ్యక్తం చేస్తున్నారు. ఇంకో రెండు రోజులు ఇదే పరిస్థితి కొనసాగితే పంటలు పూర్తిగా దెబ్బతినే అవకాశముందని భయపడుతున్నారు.

మరోవైపు విద్యుత్ సరఫరాపై కూడా ప్రభావం పడింది. చెట్లు కూలిపోవడంతో విద్యుత్ తీగలు తెగిపోవడం, ట్రాన్స్‌ఫార్మర్లు దెబ్బతినడం వంటి ఘటనలు చోటుచేసుకుంటున్నాయి. దీంతో కొన్ని ప్రాంతాల్లో విద్యుత్ సరఫరా అంతరాయం కలుగుతోంది. ఎలక్ట్రికల్, మున్సిపల్ సిబ్బంది అత్యవసర సహాయక చర్యలు చేపట్టి రహదారులను శుభ్రం చేయడం, విద్యుత్ పునరుద్ధరణకు కృషి చేస్తున్నారు.

రాబోయే రెండు రోజుల పాటు వర్షాలు కొనసాగనున్నాయని వాతావరణ శాఖ హెచ్చరించడంతో అధికారులు ప్రజలకు అప్రమత్తంగా ఉండాలని సూచిస్తున్నారు. ముఖ్యంగా పిడుగులు పడే సమయంలో చెట్ల కింద నిలబడకూడదని, పంట పొలాల్లో ఉండరాదని హెచ్చరిస్తున్నారు. మొత్తం మీద ఎండాకాలంలో ఊహించని ఈ వర్షాలు ప్రజల జీవితాన్ని గందరగోళానికి గురి చేస్తుండగా, పరిస్థితులను సమర్థంగా ఎదుర్కోవడానికి జాగ్రత్తలు తప్పనిసరి.